Հայաստանում ACCA լավագույն ուսանողներն արժանացան մրցանակի

Երդվյալ որակավորված հաշվապահների ասոցիացիան (ACCA) այս տարվա միջազգային քննություններից Հայաստանում ամենաբարձր արդյունքներ գրանցած ուսանողներին այսօր շնորհեց «Հայաստանում ACCA լավագույն ուսանող-2015» մրցանակը:

Մրցանակաբաշխությունը  կազմակերպել էին Հայաստանում Մեծ Բրիտանիայի դեսպանատունը, «Այ Էյ Բի» բիզնեսի միջազգային ակադեմիան և Երդվյալ որակավորված հաշվապահների ասոցիացիան (ACCA):

 

Լավագույն  ուսանողների մրցանակը հանձնած ՀՀ-ում Մեծ Բրիտանիայի դեսպան Ջուդիթ Ֆարնուորթը լրագրողների հետ զրույցում նշեց, որ մրցանակաբաշխությունը նպատակ ունի ճանաչելու ամենաբարձր արդյունքներ գրանցած ուսանողներին:

«Բրիտանական ծագում ունեցող ACCA միջազգային որակավորումը հնարավորություն է տալիս բոլորին զարգացնել իրենց կարիերան: ACCA-ն անցած հայ ուսանողները կարող են աշխատել ցանկացած երկրում, որտեղ որ այդ որակավորումն ընդունված է»,-ասաց դեսպանը:

«Հայաստանում ACCA լավագույն ուսանող-2015» մրցանակը ստացած Միսակ Իսաջանյանն էլ նշեց, որ ACCA-ի որակավորումն իրեն հնարավորություն է տալիս թե, տեղի, թե միջազգային աշխատաշուկայում մրցունակ լինել:

«Ավարտել եմ Հայաստանի պետական տնտեսագիտական համալսարանը, այնուհետև որոշեցի ACCA-ում որակավորում անցել, որն ինձ լայն հնարավորություն տվեց հաշվապահի մասնագիտության մեջ ավելի հմտանալու»,-նշեց Միսակը:

Երդվյալ որակավորված հաշվապահների ասոցիացիան (ACCA, Մեծ Բրիտանիա) պրոֆեսիոնալ հաշվապահների համաշխարհային մարմին է:

Այն առաջարկում է գործարար առնչություններ ունեցող առաջնայնություններով որակավորում բոլոր այն մարդկանց ամբողջ աշխարհում, ովքեր իրենց կարիերան կառուցում են հաշվապահության, ֆինանսների և կառավարման ոլորտում:  ACCA-ը հիմնադրվել է առավել քան մեկ 100-ամյակ առաջ՝ 1904 թ., Մեծ Բրիտանիայում:Այն վերաճել է միջազգային ճանաչում վայելող եզակի մի որակավորման, որն այսօր աշխարհում ամենաարագ զարգացողն է և հաշվապահության միջազգային մասնագիտական ամենամեծ մարմինն է:

Այն ավելի քան 170,000 անդամ ունի և 436,000 ուսանողներ աշխարհի 180 երկրներում և 8,500 հաստատված աշխատակից ողջ աշխարհում: Նրանց թվում են ներքին և արտաքին աուդիտորներ, գլխավոր ֆինանսական տնօրեններ, ֆինանսական հաշվապահներ, ֆինանսական վերլուծաբաններ, հարկային հաշվապահներ, ֆոնդերի կառավարիչներ, գործարար վերլուծաբաններ, բիզնես խորհրդատուներ, վարկային վերահսկողության ղեկավարներ և այլն:

ACCA-ը ստեղծել է ավելի քան 200 քննական կենտրոններ ամբողջ աշխարհում: Հայաստանում Բրիտանական խորհուրդը ACCA գրավոր քննությունների կենտրոնն է, իսկ «Այ Էյ Բի» բիզնեսի միջազգային ակադեմիան ACCA-ի համակարգչահենք քննությունների կենտրոնն է: