«Մենք որևէ բանից չենք վախենում». Արցախցի երեխաներն իրենց ապահով են զգում

«Ես ոչ մի բանից չեմ վախենում, քանի որ գիտեմ՝ մեր զինվորները, հայրիկները, պապիկները հսկում են մեր սահմանները: Մենք հանգիստ խաղում ենք մեր բակում»,- Panorama.am-ի հետ զրույցում ասաց Արցախից 9-ամյա Դավիթը:

Այսօր նա հյուրընկալվել էր ՀՀ նախագահի նստավայր՝ մասնակցելու ամանորյա տոնական միջոցառմանը:

Դավիթը պատմեց, որ իր հայրը զինծառայող է, փոխգնդապետ: Բայց իրեն ավելի դուրս է գալիս իր հայրիկի ընկերոջ աշխատանքը, ով իրավաբան է, աշխատում է ռազմական ոստիկանությունում:

Աշոտը, ով նույնպես Արցախից է, ցանկանում է լինել այնպիսի զինվոր, ինչպիսին իր հայրն  է. «Ուզում եմ զինվորական դառնալ ու հայրենիքս պաշտպանել: Ուզում եմ նաև աշխարհի չեմպիոն լինել»:

Գևորգ Հարությունյանը Հադրութից է, սովորում է 7-րդ դասարանում. «Հայրս ամսվա մեջ 14 օր բարձրանում է դիրքերը, մնացած օրերին տանն է լինում: Երբ դիրքերում է լինում, գրեթե ամեն օր խոսում ենք իր հետ: Սահմանի մասին որևէ բան չի պատմում, ասում է՝ ամեն ինչ լավ է: Ես էլ պատրաստ եմ ծառայել Զինված ուժերում: Ես ուզում եմ, որ եկող տարվա ընթացքում ոչ մի անապահով ընտանիք չլինի, սահմաններում լինի խաղաղություն, շփման գծում կրակոցներ չլինեն»:

13-ամյա Էլեն Հովհաննիսյանն էլ հպարտ է, որ հայրը զինծառայող է, բայց կցանկանար, որպեսզի այլ աշխատանք ունենար:

«Նա հսկում է, որ մեր քունը հանգիստ լինի, պաշտանում է բոլորիս, ուրախ եմ դրա համար, բայց գոհ չեմ, քանի որ ցանկացած պահի Ադրբեջանը կարող է կրակել մեր ուղղությամբ: Հայրս 14 օր դիրքերում է լինում: Արդեն սովորել ենք: Անընդհատ ուզում ենք խոսել իր հետ, բայց կամ անհասանելի է լինում կամ չի վերցնում»,- ասաց Էլենը:

Նա ցանկանում է, որ 2016-ին բոլորն ապրեն խաղաղ երկնքի տակ, մանուկներն ունենան երջանիկ և անհոգ մանկություն, զինվորներին էլ մաղթեց լավ ծառայություն:

«Միշտ ցանկանում եմ, որ մեր Արցախ աշխարհը լինի անկախ, ապրի ազատ»,- նշեց Էլենը:

Նշենք, որ Ամանորի և Սուրբ Ծննդյան տոների կապակցությամբ ՀՀ Նախագահի նստավայրում նախօրեին մեկնարկել են երեխաների համար անցկացվող ամենամյա տոնական միջոցառումները: Այսօր նախագահի նստավայրում հյուրընկալվել էին ՀՀ ԶՈՒ զինծառայողների, Երկրապահ կամավորական միության անդամների, զոհված և հաշմանդամ ազատամարտիկների ընտանիքների երեխաներ և թոռնիկներ, այդ թվում՝ Լեռնային Ղարաբաղի Հանրապետությունից, ՀՀ ոստիկանության և ազգային անվտանգության ծառայության աշխատակիցների երեխաներ: Տոնական միջոցառումներին ամեն տարի մասնակցում են 6-12 տարեկան շուրջ 1000 երեխա մայրաքաղաքից, մարզերից, Արցախից: Դեկտեմբերի 24-ին նախագահի նստավայրում կհյուրընկալվեն ՀՀ սահմանամերձ մարզերի (Գեղարքունիք, Վայոց ձոր, Արարատ, Տավուշ) մի շարք համայնքների, ինչպես նաև Հայաստանում ապաստան գտած սիրիահայ երեխաներ, սահմանափակ կարողություններով (հաշմանդամ) և Օլիմպիադաների («Կենգուրու», «Մեղու») մրցանակակիր երեխաներ: