Հյուպատոս. Սիրիայի հայ համայնքի խնդիրները մնում են Հայաստանի իշխանությունների ուշադրության կենտրոնում

Սիրիայի հայ համայնքի խնդիրները մշտապես մնում են Հայաստանի իշխանությունների ուշադրության կենտրոնում, և Հայաստանը իր հնարավորությունների սահմաններում աջակցել է և շարունակելու է աջակցել Սիրիայում բնակվող մեր հայրենակիցներին:

Այս մասին հայտարարել է Հալեպում ՀՀ գլխավոր հյուպատոս Տիգրան Գևորգյանն Հալեպի հայկական դպրոցների տնօրենների հետ հանդիպման ժամանակ:

ԱԳՆ մամուլի և տեղեկատվության վարչության հաղորդմամբ, ՀՀ գլխավոր հյուպատոսն իր երախտագիտությունն է հայտնել հայկական դպրոցների ներկայացուցիչներին հայ մանուկներին ու պատանիներին հայեցի դաստիարակելու նվիրական ու ազգանվեր գործունեության համար:

Հանդիպման ընթացքում հյուպատոս Գևորգյանը տնօրեններին է փոխանցել ՀՀ Նախագահ Սերժ Սարգսյանի Ամանորյա շնորհավորական ուղերձներն ու դրամական նվիրատվությունները:

Ներկաները շնորհակալություն են հայտնել ՀՀ Նախագահին և հայրենի իշխանություններին մշտական ուշադրության և հոգատարության համար: