Oշականի միջնակարգ դպրոցի բարեկարգումը կշարունակվի

Օշականի միջնակարգ դպրոցի հիմնական մասնաշենքը, որը Ալֆորվիլի քաղաքապետարանի /Ֆրանսիա/ և Հիմնադրամի ֆրանսիաի տեղական մարմնի հովանավորությամբ փուլ առ փուլ հիմնանորոգվում է սկսած 2008թ-ից, այսօր արդեն բարեկարգ և կահավորված` լիովին ապահովում է ուսումնառության համար անհրաժեշտ պայմանները: Այս մասին հայտնում են «Հայաստան» համահայկական հիմնադրամից :

1960-ականներին կառուցված դպրոցում ուսանում է 535 աշակերտ: Կրթօջախի թե սաները և թե տնօրինությունը մեծ գոհունակությամբ են հիշում, թե ինչպես սկիզբ առան իրար հաջորդող ծրագրերը. «Չլիներ Ալֆորվիլի և Օշականի համայնքների միջև տարիների համագործակցությունը, այսօր երևի թե չունենայինք այս բարեկարգ պայմանները» - ասել է դպրոցի տնօրեն Նաիրա Մկրտչյանն ու հավելել, «Ծրագիրը գերազանցեց մեր սպասումները. ակնկալում էինք հիմնանորոգում, ստացանք նաև կահավորում»:

Հետագա փուլերում նախատեսվում է հիմնանորոգել հանդիսություննների դահլիճն ու մարզադահլիճը, բարեկարգել ու կահավորել բակն ու բացօթյա սպորտային հրապարակը:

Ալֆորվիլն ու Օշականը` որպես քույր քաղաքներ, շարունակում են իրենց համագործակցությունը դպրոցի ամբողջական հիմնանորոգման ուղղությամբ:

Ի  նշան բարեկամության` քաղաքներն իրենց հրապարակներն անվանակոչել են Օշական և Ալֆորվիլ: