Ավագանու «Ելք» խմբակցությունն առաջարկում է «ՍԱՍ»-ի տարածքը հանրային գերակա շահ ճանաչել

Երևանի ավագանու «Ելք» խմբակցության ղեկավար Դավիթ Խաժակյանը քաղաքապետ Տարոն Մարգարյանին առաջարկում է Իսահակյան փողոցում գտնվող «ՍԱՍ» սուպերմարկետի տարածքը հանրային գերակա շահ ճանաչել ու դրա տեղում բազամահարկ  ավտոկայանատեղի կառուցել:

«Մայրաքաղաքի փողոցների բեռնաթափումը տրանսպորտի և ճանապարհաշինության բնագավառի առանցքային խնդիրներից է, և մեքենաների քանակի շարունակական աճի դեպքում պահանջում է հրատապ լուծումներ: Ակնհայտ է, որ ճանապարների գերբեռնվածությունը բնորոշ է մայրաքաղաքի կենտրոնական փողոցներին, որտեղ տեղակայված են ուսումնական և պետական հաստատություններ, առևտրի և սպասարկման օբյեկտներ:

Ճանապարհների սահմանափակ լայնությունը նվազեցնում է դրանց թողունակությունը, իսկ փողոցներում մեքենաների կայանումը ավելի է սրում այս խնդիրը: Միևնույն ժամանակ հասկանալի է, որ փողոցներում կայանման արգելքը ևս հնարավոր չէ առանց համապատասխան ավտոկայանատեղիների ստեղծման:

Մայրաքաղաքի կենտրոնական հատվածներից՝ «շրջանայինը», հագեցած է վերոնշյալ հաստատություններով և բնորոշ է իր մեջ ներառող նեղ փողոցներով, ինչպիսին են Իսահակյանը, Տերյանը, Աբովյանը, Մոսկովյանը և հարակից այլ փողոցները:

Վերը նշվածը հաշվի առնելով՝ գտնում եմ, որ նշված փողոցների հարակից հատվածում բազմահարկ ավտոկայանատեղի կառուցումը և նշված փողոցների երթևեկելի գոտիների ազատումը էապես կբարելավի քաղաքի այս բանուկ հատվածի երթևեկությունը:

Առաջարկում եմ՝ համապատասխան տրանսպորտային հոսքերի հաշվարկի և տարածքի կայանատեղիների բեռնվածության ուսումնասիրության համապատասխան արդյունքի դեպքում, դիտարկել Իսահակյան փող. 35 հասցեով շինության (ՍԱՍ սուպերմարկետի) տարածքի՝ հանրային գերակա շահ ճանաչելու և այդ տարածքում բազմահարկ ավտոկայանատեղի կառուցելու հարցը:

Այդ տարածքը հավասարահեռ է կից բեռնված փողոցներից և տրանսպորտային մեծ հոսքեր ապահովող հաստատություններից, և կարող է ընդգրկել երկայնական կայանման ավտոկայանատեղիների մեծ շառավիղ»,-ասված է  քաղաքապետին ուղղված Խաժակյանի դիմումում: