ՀԱՀ. Հայաստանում տվյալագիտության մասնագետներ կպատրաստվեն

2018թ. սեպտեմբեր ամսից Հայաստանում առաջին անգամ կդրվի նոր՝ տվյալագիտության բակալավրի աստիճանի մեկնարկը, որը եզակի նշանակություն ունի ոչ միայն Հայաստանի, այլև ողջ տարածաշրջանի համար: Ծրագրի մեկնարկին նվիրված ասուլիսում նման համազմունք հայտնեց Հայաստանի ամերիկյան համալսարանի (ՀԱՀ) փոխնախագահ Աշոտ Ղազարյանը:

«Ծրագրի հիմնական շեշտադրումը լինելու է մաթեմատիկան, վիճակագրությունը և հաշվարկումը: Մեկ տարի սովորելուց հետո ուսանողները հնարավորություն կունենան ընտրել նեղ մասնագիտացում՝ գործարար վերլուծության կամ կենսաինֆորմատիկայի ոլորտում: Ծրագիրը գտնվում է Դպրոցների և քոլեջների արևմտյան ասոցիացիայի հանձնաժողովի կողմից հավատարմագրման հաստատման գործընթացի մեջ»,-մանրամասներ ներկայացրեց բանախոսը:

Տվյալագիտության բակալավրի աստիճանը միջգիտակարգային աստիճան է, որն իր մեջ ներառում է վիճակագրական մոդելավորման, մեքենայաուսուցման և հաշվիչ գիտությունների հիմնական դրույթները: Ավարտելուց հետո ուսանողները կտիրապետեն հսկայածավալ տվյալները կառավարելու հմտություններին:

«Տվյալագիտությունն այսօր ամենից արագ զարգացող տեխնոլոգիաներից է: Հայաստանի համար սա կարևոր ուղղություն է, քանի որ հիանալի հնարավորություն է ընձեռում լինել առաջինների շարքում: Արդյունաբերական չորրորդ հեղափոխությունը նոր խաղի կանոններ է թելադրում ամբողջ աշխարհում, և ի հայտ են գալիս բեկումնային տեխնոլոգիաներ, որոնք սկսում են փոխել աշխարհը», - նշեց  ԿԳ փոխնախարար Դավիթ Սահակյանը:

Համալսարանի  Բնագիտության և ճարտարագիտության ֆակուլտետի դասախոս Արթուր Խալաթյանի խոսքով, առաջադեմ բոլոր պետությունները տվյալագիտությունը դասում են ամենակարևոր մասնագիտությունների շարքին:

«McKinsey ընկերության իրականացրած հետազոտության համաձայն, մի քանի տարի հետո ամբողջ աշխարհում տվյալագիտության ոլորտում կանխատեսվում է մոտ 500,000 մասնագետի դեֆիցիտ»,-ասաց նա:

Նշվեց, որ տվյալագիտության նպատակը էլեկտրոնային տվյալներից գիտելիքի ստացումն է: Այն ամենաարագ զարգացող մասնագիտություններից մեկն է: Ըստ որոշ գնահատականների, ողջ աշխարհում, այդ թվում և Հայաստանում, տվյալագիտության աշխատաշուկայում առաջարկի և պահանջարկի միջև տարբերությունը հասնում է մինչև 50%-ի:

Տվյալագիտությունը և մեքենայական ուսուցումն այսօր կիրառվում են ֆինանսական և բանկային
ոլորտներում, էլեկտրոնային կառավարման համակարգերում: Խոշորագույն կազմակերպությունները, ինչպիսիք են Google-ը, Amazon-ը, Facebook-ը և IBM-ը, հսկայական միջոցներ են ներդնում տվյալագիտության ոլորտում առաջատար դիրքեր գրավելու համար: