Բորիս Նավասարդյան. Ո՞ւմ հիվանդ գլխում է ծնվել լրատվամիջոցների հաշվառման ընթացակարգը օրենքով ամրագրելը

Արդարադատության նախարարությունը Իրավական ակտերի նախագծերի հրապարկման միասնական կայքում հանրային քննարկման է դրել նախագիծ՝ առաջարկելով հաշվառման համակարգ ներդնել մեդիաների համար։

Առայժմ քվեարկել է 9 մարդ, որից յոթը դեմ  է արտահայտվել նախագծին։

Նախագիծը մտահոգություններ է առաջացրել լրագրողական կազմակերպությունների ներկայացուցիչների մոտ։

«Ինֆորմացիայի ազատության կենտրոն» ՀԿ-ի հիմնադիր նախագահ Շուշան Դոյդոյանը նկատել է.

«Այն, ինչ հաջողությամբ կիրառել է Արդարադատության նախարարությունը 90-ականներին, չի նշանակում, որ 20 տարի հետո արդիական կլինի։ Ինչպես նաև, Զանգվածային լրատվության մասին ՀՀ օրենքում որեւէ նոր կարգավորում առաջարկելուց կառավարությունը պարտավոր է այն նախ քննարկել մասնագետների հետ հետո դնել հանրային քննարկման»։

Երևանի մամուլի ակումբի նախագահ Բորիս Նավասարդյանն էլ  ֆեյսբուքյան իր էջում գրել է.

«Ո՞ւմ հիվանդ գլխում է ծնվել լրատվամիջոցների հաշվառման ընթացակարգը օրենքով ամրագրելը: Հարցը նույնիսկ նրա մասին չէ, պե՞տք է լինի թե ոչ հաշվառում, որն իրականում, ըստ օրինագծի տրամաբանության, գրանցում է իրենից ներկայացնում: Խնդիրը` առանց «Զանգվածային լրատվության մասին» օրենքի անհրաժեշտ փոփոխության հայեցակարգ ունենալու այդպիսի նախաձեռնությամբ հանդես գալու մեջ է»։