ԵՊՀ ռեկտորի պաշտոնակատար. Արժե բուհերում անցնել «Հայոց լեզու և գրականություն» ու «Հայոց պատմություն»

ԵՊՀ ռեկտորի պաշտոնակատար Գեղամ Գևորգյանն այն կարծիքին է, որ «Հայոց լեզու և գրականություն», «Հայոց պատմություն» առարկաներն արժե անցնել բուհերում, սակայն երբ և ինչպեսը՝ քննարկման առարկա է: Լրագրողների հետ զրույցում նա նշեց, որ արժե «Հայոց պատմության հիմնահարցերը» առարկան անցնել 3-րդ կամ 4-րդ կուրսում:

«Ավագ դպրոցում անցնում են այդ առարկան: Եթե ուզում ենք նորովի ինչ-որ բան անցնել, նրանց գոնե 2-3 տարի ընդմիջում է պետք, որպեսզի հասունանան և նորովի ուսուցանենք «Հայ ժողովրդի հիմնահարցերը»,- նշեց ԵՊՀ ռեկտորի պաշտոնակատարը:

Նույնը, նրա խոսքով, վերաբերում է նաև «Հայոց  լեզու և գրականություն» առարկային. «Իրականում ԵՊՀ-ում այդ առարկան այդ անունով չէ, ավելի պիտանի ծրագրերով ենք անցնում, հարմարեցված մասնագիտություններին: 

Եթե ուզում ենք, որ բուհում հայոց լեզուն նպաստի մասնագետի՝ հայեցի արտահայտվելու որակի լավացմանը, պետք է որոշակի մասնագիտական կրթություն ստանա, դրանից հետո փորձենք նրա մասնագիտական լեզուն դարձնենք ավելի հայեցի»:

Հիշեցնենք, որ այսօր ԵՊՀ հայ բանասիրության ֆակուլտետի ուսանողները դասադուլ էին անում, բողոքում էին կրթության, գիտության, մշակույթի և սպորտի նախարարության կողմից  մշակված «Բարձրագույն կրթության և գիտության մասին» նոր նախագգծի դեմ, որի համաձայն, բուհերում «Հայոց լեզու», «Հայ գրականություն» և «Հայոց պատմություն» առարկաների դասավանդումը պարտադիր չի լինելու:

Գ. Գևորգյանը հանդիպել է բողոքող ուսանողների, նաև դասախոսների հետ:

«Որևէ մեկի կարծիքին բռնանալ չեմ ուզում, փորձը ցույց է տվել, որ անարդյունավետ ճանապարհ է: Եղել է փոխադարձ պայմանավորածություն, որ նրանք պետք է գրավոր ներկայացնեն իրենց պահանջները, նաև եթե ուզում են ստորագրահավաք,  պետք է լինի ոչ թե ընդհանրապես, այլ կոնկրետ տեքստի վրա»,- ասաց ԵՊՀ ռեկտորի պաշտոնակատարը:

Նրա խոսքով, եթե ուսանողները որոշեն դասադուլ կամ գործադուլ անել, պետք է անեն շենքից դուրս, որպեսզի չխանգարեն այն ուսանողների դասապրոցեսը, որոնք չեն մասնակցում:  

«Ես կողմնակից եմ անհատական կարծիքներ լսելուն: Գոնե այս հարցում հավաքվել և կոլետիվ բան որոշել, իմ կարծիքով, ճիշտ չէ: Ամեն ոք պետք է իր կարծիքը հայտնի, իսկ թե ինչքանով են այդ կարծիքը լսում,  կախված է նրանից, թե ով է արտահայտել և ինչպես»,- ասաց Գ. Գևորգյանը: