Ապագա ստոմատոլոգները՝ Հայաստանի չեմպիոններ

ԵՊԲՀ ստոմատոլոգիական ֆակուլտետի 3-րդ կուրսի ուսանողներ Դավիթ Մակյանն ու Անիտա Մակյանն այս տարի ևս մարզական մեծ հաջողություններ են գրանցել:

ԵՊԲՀ հասարակայնության հետ կապերի բաժնի փոխանցմամբ, քույր և եղբայր Մակյանները մարտի սկզբին մասնակցել են Հայաստանի կարատեի ազգային ֆեդերացիայի կողմից անցկացվող Մեծահասակների կարատեի Հայաստանի ազգային առաջնությունը և հաղթելով՝ դարձել են Հայաստանի չեմպիոններ. Դավիթ Մակյանը՝ 75 կգ քաշային, իսկ Անիտա Մակյանը՝ 68 կգ քաշային կարգերում:

Այսօր սովորողներին՝ Կարատեի ազգային ֆեդերացիայի մեծահասակների գլխավոր մարզիչ Արման Մակյանի գլխավորությամբ ընդունեց ԵՊԲՀ ռեկտոր Արմեն Մուրադյանը:

Ռեկտորը, շնորհավորելով մարզիկներին, նորանոր մարզական և մասնագիտական հաջողություններ մաղթեց: Ապագա ստոմատոլոգները նշել են, որ իրենց հաղթանակը նվիրում են ԵՊԲՀ-ի 100-ամյա հոբելյանին: Անիտան ի պատասխան ռեկտորին հարցի նշել է, որ դեռ չի կողմնորոշվել ապագա մասնագիտության ընտրության հարցում, իսկ Դավիթը՝ որպես նեղ մասնագիտացում, հավանաբար, կընտրի օրթոպեդիան:

Ապագա ստոմատոլոգներն ընդգծել են, որ սպորտը չի խանգարում ուսմանը, նրանք փորձում են համատեղել ուսումը մարզակայն հաջողությունների հետ:

Մարզական ընտանիքը ռեկտորին ներկայացրել է հետագա ծրագրերը: Մասնավորապես, նրանք պատրաստվում են մասնակցել Սերբիայում ամռանը կայանալիք կարևատեի Եվրոպայի ուսանողական բուհական առաջնությանը՝ ներկայացնելով ԵՊԲՀ-ն և Հայաստանը:

ԵՊԲՀ ռեկտորը ողջունելով ուսանողների մարզական հաջողությունները՝ խրախուսում է կարատեի խմբակների ստեղծումը բժշկական համալսարանում և ուսանողների ներգրավվումն այդ սպորտաձևին: