«Բունդեսլիգա»-ն պատրաստ է մայիսին վերսկսել խաղերը

«Բունդեսլիգա»-ն  ցանկանում է մայիսին վերսկսել ֆուտբոլային հանդիպումները, գրում է «Բի-Բի-Սի»-ն։

Նշվում է, որ որոշման համար հիմք է հանդիսացել փաստը, որ վերջին օրերին Գերմանիայում կորոնավիրուսի տարածման տեմպը դանդաղել է, իսկ COVID-19-ի հետևանքով մահերի թիվը նվազել է։

Գերմանիայի ֆուտբոլի լիգան (DFL), որը պատասխանատու է «Բունդեսլիգա»-ի և երկրորդ դիվիզիոնի խաղերի անցկացման համար, որոշել է ավարտին հասցնել ընթացիկ մրցաշրջանը: Ապրիլի 23-ին լիգայի 36 պրոֆեսիոնալ ակումբները հանդիպել են՝ քննարկելու մայիսին մրցաշրջանը վերսկսելու հարցը։

Այնուամենայնիվ, նշվում է, որ խաղերը սկսելուց առաջ լիգան նախ պետք է ստանա Գերմանիայի իշխանությունների դրական պատասխանը։

«Մենք պատրաստ ենք մայիսի 9-ին սկսել խաղերը, եթե խաղերն ավելի ուշ սկսվեն, մենք կրկին պատրաստ կլինենք»,- ասել է DFL-ի գլխավոր գործադիր տնօրեն Քրիստիան Սայֆերտը: