Իր հարազատի դիակը տվել են՝ ամբողջ ատամնաշարը ջարդված. Նաիրա Զոհրաբյան

«Կքննարկենք օրերս մի քաղաքացու հայտարարությունն այն մասին, որ իր հարազատի դիակը տվել են ամբողջ ատամնաշարը ջարդված»,- Խորհրդարնում Նոր կորոնավիրուսի տարածումը կանխելու և այդ համաճարակի մեղմման կամ վերացման ուղղությամբ ՀՀ կառավարության և պարետատան իրականացրած միջոցառումների արդյունավետությունը, ինչպես նաև արտակարգ դրության ժամանակահատվածում մարդու իրավունքների և հիմնարար ազատությունների սահմանափակումների արդյունավետությունը ու իրավաչափությունը ուսումնասիրելու նպատակով  ստեղծված ԱԺ քննիչ հանջնաժողովի  կազմի ընտրության  ժամանակ հայտարարեց «Բարգավաճ Հայաստան» խմբակցության պատգամավոր Նաիրա Զոհրաբյանը:

Զորհրաբյանի խոսքով, ինքը հասկացել է,  որ իշխանական գործընկերները հավաստի փաստեր ունեն առ այն, որ ընդդիմության անպատասխանատու քայլերի և գործողությունների արդյունքում կորոնավիրուսը մետաստազի  նման տարածվել է, հետևաբար այն լավ առիթ է, որպեսզի մեծամասնությունը շահագրգռված լինի քննիչ հանձնաժողովի աշխատանքների մեջ, և կողմ քվեարկեն հանձնաժողովի կազմին և միասին քննարկեն հանրահավաքների ժամանակ և «Այո»-ի քարոզարշավի ժամանակ վարակվածների փաստերը, Հռոմից և Իտալիայից կատարած անպատասխանատու թռիչքների, կորոնավիրուսը պինցետով և արաղով ախտահանելու մասին հայտարարության հարցերը:

«Ձեզ հետ միասին կքննարկենք՝ հիմա լեռները մագլցող, սկալալազ նախարարի՝ «դիմակ դրեք, մի դրեք… վայ լրագրողներ, ես եկել եմ, հեսա ձեզ կվարակեմ, խա-խա-խա…» հայտարարությունները»,- նշեց «Բարգավաճ Հայաստան» խմբակցության պատգամավորը: Վերջինս նկատեց, որ հանձնաժողովը հնարավորություն կունենա քննարկել, թե ինչպես գյումրեցի տատիկի դիակը կորավ և հետո հայտնվեց Նոր Հաճնում՝ ուրիշի գերեզմանոցում ու հետո արտաշիրիմում արեցին:

Նրա խոսքով, հնարավորություն կստեղծվի քննարկել վարչապետի այն մտահոգությունը, որ որոշ դեպքերում մարդիկ մահացել են, որովհետև շտապօգնության մեքենան չի հասցրել հիվանդանոց,  թե ինչի վրա է ծախսվել կորոնավիրուսի հիմնադրամի գումարները, կամ թե ինչու տան պայմաններում բուժում ստացածները որևէ դեղորայք պետության կողմից չեն ստացել, երբ որ հիմնադրամին հսկայական գումարներ են ներարկվել:

«Հնարավոր է պարզվի, որ համակարգը փայլուն աշխատել է և, օրինակ, առողջապահության նախարարին քննիչ հանձնաժողովը վերջում ներկայացնի «Արիության» մեդալի, եթե շատ ձգենք՝ միգուցե նաև Ազգային հերոսի»,- նկատեց Զոհրաբյանը:

Նշելով, որ եվրոպական շատ երկրներում ընդդիմության առաջարկով քննում են համաճարակի ժամանակ իշխանությունների գործունեությունը՝ Նաիրա Զոհրաբյանը չբացառեց, որ Հայաստանում հանձնաժողվի ձևավորումից հետո պարզվի, որ արդյունքում ամեն ինչ հրաշալի է և բոլորով միասին Արսեն Թորոսյանին, պարետին և մյուս պատասխանատուներին հանձնեն «Արիության» մեդալ քովիդի դեմ պայքարն, իր սուբյեկտիվ կարծիքով, տապալելու համար: