Կորոնավիրուսի թվերի աճի ֆոնին՝ Վրաստանում կոչ են անում կրել շնչադիմակներ և պաշտպանել սոցիալական հեռավորություն

Վրաստանի վարչապետ Գիորգի Գախարիայի գլխավորությամբ գործող միջգերատեսչական համակարգող խորհուրդը քաղաքացիներին մեկ անգամ ևս կոչ է անում, գործել սահմանված կանոնակարգերով, կրել շնչադիմակներ և պաշտպանել սոցիալական հեռավորություն, որը վարակման դեպքերի կանխարգելման կարևոր նախապայման է:

Այս մասին գրում է վրացական Առաջին ալիքը։

Խորհրդի նիստին, որն անցկացվել է կառավարության վարչությունում, քննարկել են երկրում տիրող համաճարակային վիճակը և վարակի տարածման դինամիկան: Նշվել է, որ վարակման դեպքերի ավելացած թիվը խուճապի հիմք չէ, քանի որ իրավիճակը վերահսկվում է և կառավարվում:

Մեկ անգամ ևս ընդգծվել է այն փաստը, որ արտակարգ դրություն և լայնամասշտաբ խիստ սահմանափակումներ չեն գործարկվի:

Կառավարության վարչության ղեկավար Նաթիա Մեզվրիշվիլին միջգերատեսչական համակարգող խորհրդի նիստի ավարտից հետո հայտարարել է, որ տնտեսությունը չի փակվի, քանի որ դա կվնասի քաղաքացիներին, ուստի յուրաքանչյուր քաղաքացի պետք է ցուցաբերի պատասխանատվություն:

Վրաստանում արձանագրված է կորոնավիրուսի 3913 դեպք, որից ապաքինվել է 1574 մարդ։ Արտասահմանից բուժման նպատակով Վրաստան է տեղափոխվել 41 քաղաքացի: Մահացել է 23 վարակակիր:

Կարանտինի ռեժիմում գտնվում է 4988 քաղաքացի, ստացիոնար հսկողության տակ՝ 836-ը: