Անակնկալներ են սպասվում ռադիոտեխնիկական հետախուզական ապացույցներով. ՊՆ ներկայացուցիչ

«Թուրքական F-16-երը զույգերով համապատասխան խնդիրներ են կատարում։ Այս պահին չեմ կարող հայտնել, թե որ երկրի տարածքով են գնացել Ադրբեջան, բայց մենք այդ տեղեկությանն էլ ենք տիրապետում»,- ասուլիսում ասաց ՀՀ պաշտպանության նախարարության ներկայացուցիչ Արծրուն Հովհաննիսյանը:

Նրա խոսքով, Թուրքիայի Հանրապետության ռազմաօդային ուժերին պատկանող F-16 կործանիչներն Ադրբեջանում օգոստոսի 13-14-ի զորավարժությունների ավարտից հետո չեն հանվել, այլ մնացել են օդանավակայաններում: Այդ մասով, ըստ Ա.Հովհաննիսյանի,  ՀՀ պաշտպանության նախարարությունը հարցը բարձրացրել է համապատասխան մարմիններում:

«Ադրբեջանը փորձում է ամեն կերպ սա չընդունել, նաև ծիծաղելի հայտարարությունը, որ իրենց  ռազմաօդային ուժերի կազմում չկա F-16-եր: Շատ լավ գիտենք, թե իրենց ռազմաօդային ուժերի կազմում ինչ կործանիչներ կան: Լավ գիտենք, որ իրենց կազմում եղած կործանիչները չեն կարող իրենց առաջադրված խնդիրները կատարել ինչպես հարկն են: Դրա համար F-16-երն այնտեղ են:

Լավ գիտենք, որ F-16-երի հետ վաղուց աշխատում էին: Հայաստանը տիրապետում է  համապատասխան տեղեկությունների, այդ թվում՝ ռադիոտեխնիկական հետախուզական միջոցների: Բոլոր նրանց, ովքեր հերքում են, փորձում են լուրջ չվերաբերել պաշտոնական մեր տեղեկություններին, անակնկալներ են սպասվում ռադիոտեխնիկական հետախուզական ապացույցներով:

Եթե որևէ մեկի մոտ կասկած կա, մենք կարող ենք ամեն ինչ իր հերթին ներկայացնել: Միջազգային փորձագետներ կան, որ պետք է տեսնեն, ուսումնասիրեն, կարող ենք այդ ամեն ինչը տրամադրել»,- ասաց Ա.Հովհաննիսյանը:

ՊՆ ներկայացուցիչը նաև նշեց, որ F-16-ի օդաչուները շատ ավելի փորձառու են, ի տարբերություն ադրբեջանական օդուժի օդաչուների. «Նրանք չեն մտնում ոչ Հայաստանի, ոչ Արցախի օդային տարածք: Հայաստանի օդային տարածքի խորքեր չեն մտել, կարող է առանձին դրվագներ լինեն, հաշվի առնելով այն հանգամանքը, որ տվյալ հատվածում գտնվում է նաև Հայաստան-Արցախ սահմանահատվածը:

Կոնկրետ սահմանի երկայնքի վրա բարձությունը չեն խախտում, բաց իրենք նման գործելաոճի կարիք չունեն, քանի որ հեռահար միջոցներով խնդիրները լուծելու հնարավորություն ունեն:

F-16 կարող է ֆիզիկապես չմտնել Հայաստանի օդային տարածք, բայց հարված հասցնել Հայաստանի օդային տարածքին: Միջազգային տեսակետից բացարձակապես էական չէ՝ F-16-ը ֆիզիկապես գտնվում էր Վարդենիսի գլխավերևում, թե ոչ, թե գտնվում էր «Գյանջա»-ի գլխավերևում: Բայց եթե Վարդենիս տարածաշրջանին հրթիռային հարված է հասցնում, նշանակում է՝  խախտել է Հայաստանի օդային սահմանը»:

Հիշեցնենք՝  սեպտեմբերի 27-ին ժամը 07:15-ի սահմաններում, Ադրբեջանը, օգտագործելով հրետանային միջոցներ ու հարվածային ԱԹՍ-ներ, հարձակման է անցել արցախա-ադրբեջանական ողջ շփման գծով։

Սեպտեմբերի 29-ի առավոտյան, Ադրբեջանի «Գյանջա» օդանավակայանում տեղակայված Թուրքիայի Հանրապետության ռազմաօդային ուժերին պատկանող F-16 կործանիչներից մեկի կողմից խոցվել է ՀՀ տարածքում գտնվող ռազմական և քաղաքացիական օբյեկտների վրա ադրբեջանական հարձակումները հետ մղելու նպատակով ՀՀ օդային տարածքում՝ Վարդենիսի շրջանում, մարտական խնդիրները կատարող ՀՀ ԶՈւ ռազմաօդային ուժերի ՍՈւ-25 գրոհիչը: Զոհվել է ՀՀ ԶՈՒ օդաչու մայոր Վալերի Դանելինը: