Որոշումն իրավական է, սակայն քաղաքական ազդեցության տակ ընդունված. Դավիթ Հարությունյան

«ՄԵզ համար ամենևին անակնկալ չէր, եզրափակիչ խոսքումս հայտարարել եմ այդ մասին, որովհետև ակնհայտ էր, թե պրոցեսն ինչպես է վարվում»,- ՍԴ որոշումից հետո լրագրողներին ասաց «Պատիվ ունեմ» կուսակցությունների դաշինքի ներկայացուցիչ Դավիթ Հարությունյանը։

Նա ընդգծեց՝ որոշումն իրավական է, սակայն քաղաքական ազդեցության տակ ընդունված։ 

Հիշեցնենք, որ ՍԴ-ն որոշեց Կենտրոնական ընտրական հանձնաժողովի 2021 թվականի հունիսի 27-ի ԱԺ արտահերթ ընտրությունների արդյունքներն ամփոփելու մասին թիվ 184-Ա որոշումը թողնել ուժի մեջ։

Ընտրությունների արդյունքներն անվավեր ճանաչելու «Հայաստան» դաշինքի, «Զարթոնք» ազգային քրիստոնեական կուսակցության, «Հայոց Հայրենիք» կուսակցության և «Պատիվ ունեմ» կուսակցությունների դաշինքի դիմումներով գործերը ՍԴ-ում  միավորել էին ու քննել նույն նիստում։

ՍԴ-ից հայտնել էին, որ միավորման համար հաշվի է առնվել, որ ՀՀ Կենտրոնական ընտրական հանձնաժողովի 2021 թվականի հունիսի 27-ի` «Հայաստանի Հանրապետության Ազգային ժողովի 2021 թվականի հունիսի 20-ի արտահերթ ընտրությունների արդյունքներն ամփոփելու մասին» թիվ 184-Ա որոշման հետ կապված վեճի վերաբերյալ» գործերը վերաբերում են նույն հարցին։