Ամենից շատ կարդացված նյութեր
.jpg "Պատերազմից հետո ամբողջը փուլ եկավ. Նարինե Գրիգորյան")
«Պատերազմից հետո ընդհանրապես տրամադրված չէի բեմ բարձրանալ, ծանր շրջան էր ու չէիր կարողանում հասկանալ՝ ինչի համար խաղաս, հանուն ինչի»,- ասուլիսում ասաց Սոս Սարգսյանի անվան Համազգային թատրոնի տնօրեն Արման Նավասարդյանը:
Նա նշեց, որ կային ներկայացումներ, որոնք պիտի դուրս գային խաղացանկից:
«Մենք ունեինք «Հաղթանակի գենեզիս» ներկայացումը: Պատերազմից հետո խնդրեցի Նարինե Գրիգորյանին, որ ես այլևս չեմ կարող այդ ներկայացումը խաղել, ինքն էլ, ոչ մեկս պատրաստ չէինք խոսել հաղթանակի, Շուշիի ազատագրման, հերոսական անցյալի, ավագ սերնդի սխրանքների մասին:
Բայց հիմա այդ ներկայացումը խաղացինք և հասկացանք, որ՝ չէ, պետք է խաղալ այդ ներկայացումը, պետք է ասել՝ մենք ինչ ենք ունեցել, ինչի արդյունքում ենք եղել հաղթած և դա համարենք թեկուզ դասաժամ, որ մենք ապրել ենք հաղթանակի բերկրանքը»,- ասաց Ա. Նավասարդյանը:
Իսկ ինչ վերաբերում է պատերազմական թեմաներով նոր բեմադրություններ անելուն՝ թատրոնի տնօրենը նշեց, որ հատուկ ստեղծագործելու թեմա չէ, պիտի ինքն իրեն լինի կամ չլինի, թեման պիտի ուզի, որ այդ թեմայի մասին խոսես:
Թատրոնի գեղարվեստական ղեկավար Նարինե Գրիգորյանն ասաց, որպեսզի կարողանաս մի երևույթն արվեստ դարձնել ու դրա մասին պատմել՝ պիտի օտարանաս այդ երևույթին:
«Մեզ համար հիմա դա շատ ցավոտ թեմա է, որպեսզի կարողանանք նորից պատմել այս պատերազմի մասին: Հայրենական պատերազմից, Արցախյան առաջին պատերազմից հետո մոտ 15 տարի անհրաժեշտ էր, որպեսզի մարդիկ կարողանային պատմել այդ մասին: Առավել ևս արվեստում ոչինչ չի կարող զոռով լինել»,- նշեց նա:
Միաժամանակ Նարիեն Գրիգորյանը հավելեց, որ մինչև պատերազմը բոլորովին այլ խաղացանկ էր նախատեսված, բայց պատերազմից հետո ամբողջը փուլ եկավ:
«Բոլոր այն պիեսները, որոնք նախատեսել էի, որոնք թարգմանվել էին ներկայացնելու համար, ինձ թվաց անիմաստ է: Հետո, մեծ դժվարությամբ նորից սկսեցի ստեղծել այն խաղացանկը, որը հիմա է անհրաժեշտ՝ զգալով հենց այն պահանջները, որ ունեցել եմ:
Երբ հոգիդ կոշտանում է, չես կարողանում սիրո մասին խոսել և հենց դրա համար ենք անում այնպիսի ներկայացումները, որպեսզի ասենք՝ միևնույնն է, ինչ-որ տեղի է ունենում, մարդու համար է, բայց ամենակարևորը՝ ինչ մարդու համար ստեղծվել է՝ սերն է, որ պիտի տալ կողքինին ու ապրեցնել իրար:
Թե խաղացանկն է գլխիվայր շրջվել, թե այն, ինչ պետք է հետո արվեր, կան նաև ներկայացումներ, որոնք չենք խաղում, քանի որ չի խաղացվում»,-ասաց Նարինե Գրիգորյանը:
Studio One