Էրդողանը կքննարկի իսրայելական գազ Թուրքիա մատակարարելու հարցը

Միջերկրական ծովում Իսրայելի արդյունահանած բնական գազի Թուրքիա մատակարարումները քննարկման առարկա կդառնան հարաբերությունները վերականգնելու փորձերի ֆոնին՝  Իսրայելի վարչապետ Նաֆթալի Բենեթի առաջիկա այցի ընթացքում։ Ինչպես հաղորդում է Reuters-ը, այդ մասին հայտարարել է Թուրքիայի նախագահ Ռեջեփ Թայիփ Էրդողանը։

Նրա խոսքով՝ Անկարան պատրաստ է համագործակցել Իսրայելի հետ էներգետիկ ոլորտում։ Միաժամանակ Էրդողանը չի բացառել, որ իսրայելական գազը կարող է մատակարարվել ոչ միայն Թուրքիայի ներքին շուկա, այլև Եվրոպա։

Թուրքիայի տարածքով Եվրոպա իսրայելական գազի մատակարարումների հարցը քննարկվում է դեռ 2016 թվականից։ Սակայն դրա համար անհրաժեշտ է ամբողջությամբ կարգավորել երկու պետությունների հարաբերությունները, որոնք սրվեցին 2010 թվականին իսրայելական ծովայինների կողմից Պաղեստինին աջակցող թուրք ակտիվիստների սպանությունից հետո։