Կառավարությունը հաստատեց Սրբուհի Գևորգյանին ՀՊՄՀ-ի ռեկտորի թափուր պաշտոնում

«Ցանկանում եմ նշել, որ 100-ամյա ավանդույթներ ունեցող այս կարևորագույն ԲՈՒՀ-ն առաջին անգամ կին ռեկտոր է ընտրել: Շատ խորհրդանշական է, որ այդ ընտրության արդյունքները հաստատվում են այսօր՝ ապրիլի 7-ին, Մայրության և գեղեցկության օրը»,- կառավարութան նիստին հայարարեց Կրթության, գիտության, մշակույթի և սպորտի նախարար Վահրամ Դումանյանը՝ ներկայացնելով Խաչատուր Աբովյանի անվան հայկական պետական մանկավարժական համալսարանի ռեկտորի պաշտոնում Սրբուհի  Գևորգյանի ընտրության արդյունքները:

Նրա խոսքով՝ ընտրությունը տեղի է ունեցել 2022 թ.մարտի 19-ին, որն ընթացել է համալսարանի կանոնադրության և հոգաբարձուների խորհրդի կողմից հաստատված ռեկտորի ընտրության ընթացակարգին համաձայն:

Ըստ Վահրամ Դումանյանի՝ նիստին մասնակցել են խորհրդի 20 անդամ և փակ գաղտնի քվեարկության արդյունքներով հոգաբարձուների խորհուրդը 19 կողմ, 0 դեմ, 1 անվավեր ձայներով 5 տարի ժամկետով ռեկտոր է ընտրել հոգեբանական գիտությունների դոկտոր, պրոֆեսոր Սրբուհի Գևորգյանին:

ԿԳՄՍ նախարարը հիշեցրեց, որ այս տարի լրանում է Մանկավարժական համալսարանի հիմնադրման 100-ամյակը:

Սրբուհի Գևորգյանը շնորհակալությունը հայտնեց վստահության համար։