2022 թ. հունվար -մարտին ՇՄՆ-ն տվել է ստորերկրյա ջրային ռեսուրսների օգտագործման 18 թույլտվություն. Գայանե Գաբրիելյան

«Շրջակա միջավայրի նախարարությունը 2021 թվականի հունվար-մարտ ամիսներին տվել է 120 ջրօգտագործման թույլտվություն՝ նոր հայտ, երկարաձգում, վերաձևակերպում կատեգորիաներով»,- ՀՀ  Ջրային օրենսգրքում լրացումներ և փոփոխություններ կատարելու մասին նախագիծը զեկուցելիս ԱԺ-ում հայտնեց ՇՄ նախարարի տեղակալ Գայանե Գաբրիելյանը:

Նրա խոսքով՝ ձկանբուծական  նպատակով տրվել է 12 ջրօգտագործման թույլտվություն, էներգետիկ՝ 3 և մերժվել է 6  հայտ:

«Նույն ժամանակահատվածի համար այս տարի ջրօգտագործման թույլտվություն տրվել է 56 տնտեսվարողի, ստորերկրյա ջրային ռեսուրսների համար տրվել է 18 հայտ, էներգետիկ նպատակով՝ 4 և մերժվել է 3 ջրօգտագործման թույլտվություն»,-հայտնեց ՇՄ փոխնախարարը:

Պատասխանելով Էկոլոգիական թողքի պահպանման վերահսկողության մասին հարցին՝ Գաբրիելյանը հայտնեց, որ նախատեսվում է 2024 թվականին ներդնել էլեկտրոնային հոսքաչափերի  պարտադիր պայման, որի դեպքում առցանց հնարավոր կլինի վերահսկել ոչ միայն օգտագործվող ջրի ծավալն, այլ նաև էկոլոգիական թողքը: