Իրանի պատվիրակությունը կմեկնի Վիեննա՝ շարունակելու միջուկային համաձայնագրի շուրջ բանակցությունները

Իրանական պատվիրակությունը մի քանի ժամվա ընթացքում կմեկնի Վիեննա՝ շարունակելու միջուկային համաձայնագրի շուրջ բանակցությունները։ Այս մասին չորեքշաբթի օրը հայտարարել է Իրանի ԱԳՆ պաշտոնական ներկայացուցիչ Նասեր Կանանի Չաֆին։

«Մեր երկրի նկատմամբ անարդար պատժամիջոցները չեղարկելու քաղաքականության շրջանակում իրանական բանակցային խումբը՝ Ալի Բաղերի Կանիի գլխավորությամբ, մի քանի ժամից կմեկնի Վիեննա»,-ՏԱՍՍ-ի փոխանցմամբ՝ նրա խոսքը մեջբերում է Իրանի նախարարության մամուլի ծառայությունը։ Դիվանագետի խոսքով՝ բանակցությունների այս փուլի ընթացքում քննարկում և մտքերի փոխանակում է լինելու կողմերի ներկայացրած առաջարկների, այդ թվում՝ Իրանի առաջարկած գաղափարների շուրջ։

Չորեքշաբթի ավելի վաղ Իրանի խորհրդարանի (մեջլիսի) պատգամավոր Ջավադ Քարիմի Գոդուսին հայտարարել էր, որ միջուկային գործարքի վերականգնման բանակցային գործընթացը կարող է վերսկսվել օգոստոսի 8-ից հետո։