Շախմատի օլիմպիադա․ 8-րդ տուրից հետո Հայաստանի տղամարդկանց հավաքականը գլխավորում է մրցաշարային աղյուսակը

Հնդկաստանի Չեննայ քաղաքում ընթացող Շախմատի համաշխարհային 44-րդ օլիմպիադայում նախօրեին կայացել են 8-րդ տուրի պարտիաները:

Տղամարդկանց հավաքականը 2,5:1,5 հաշվով հաղթանակ է տարել տանտերերի առաջին թիմի նկատմամբ։ Գրոսմայստեր Գաբրիել Սարգսյանը համառ պայքարում առավելության է հասնել Պենտալա Հարիկրիշնայի նկատմամբ, իսկ Հրանտ Մելքումյանը, Սամվել Տեր-Սահակյանն ու Ռոբերտ Հովհաննիսյանը, ոչ-ոքի են ավարտել իրենց պարտիաները։

8-րդ տուրից հետո մեր ընտրանին թիմային 15,0 միավորով շարունակում է միանձնյա գլխավորել մրցաշարային աղյուսակը:

Հայաստանի կանանց հավաքականը 0,5։3,5 հաշվով պարտվել է Վրաստանի թիմին։

Համաշխարհային օլիմպիադայում կանցկացվի 11 տուր։