Ռուսաստանը «բարոյական իրավունք» չունի մասնակցելու G20-ին. Մեծ Բրիտանիայի ԱԳՆ

Ռուսաստանը «բարոյական իրավունք» չունի մասնակցելու G20-ի գագաթնաժողովին, որը կկայանա նոյեմբերին Բալիում, «Ռիա նովոստի»-ի փոխանցմամբ, այս մասին հայտնել են Մեծ Բրիտանիայի ԱԳՆ-ից։

«Ռուսաստանը բարոյական իրավունք չունի ներկա գտնվելու G20-ին, քանի դեռ նրա ագրեսիան Ուկրաինայի դեմ շարունակվում է»,- գործակալությունը մեջբերում է Մեծ Բրիտանիայի ԱԳՆ ներկայացուցչի խոսքերը։

Ընդ որում, ավելի վաղ Մեծ Բրիտանիայի ԱԳ նախարար Լիզ Թրասը հայտարարել էր, որ մտադիր է հանդիպել ՌԴ նախագահ Վլադիմիր Պուտինի հետ գագաթնաժողովին մասնակցելու դեպքում:

G20-ի ղեկավարների հանդիպումը կկայանա նոյեմբերին Բալիում։ Ավելի վաղ մի շարք երկրներ կոչ էին անում բացառել Ռուսաստանին G20-ից, սակայն Ինդոնեզիան, որպես ամենաբարձր մակարդակով նախագահող, հայտարարեց, որ ցանկանում է միավորել G20-ը և կանխել դրա պառակտումը: Գագաթնաժողովի հրավերն ուղարկվել է Պուտինին։

Նշվում է, որ ՌԴ նախագահն ընդունել է հրավերը։ Որպես փոխզիջում Ինդոնեզիան նաև հրավիրել Է Ուկրաինային, որը «քսանյակի» մեջ չի մտնում։