Ուկրաինայի գրողների միությունը պահանջել է փակել Կիևում գտնվող Բուլգակովի թանգարանը

Ուկրաինայում պահանջել են փակել ռուս գրող Միխայիլ Բուլգակովի թանգարանը Կիևում՝ այն քաղաքում, որտեղ ծնվել է գրողը։ 

«Գազետա.ռու»-ի փոխանցմամբ,  Գրողների ազգային միությունում հայտարարել են «Կիևում ռուս գրողի թանգարանի գործունեության անթույլատրելիության մասին»: Ակտիվիստները վստահ են, որ Բուլգակովը «ատել է Ուկրաինան և նսեմացրել այն իր ստեղծագործություններում»։

Բուլգակովի հետ կապված ցուցանմուշներն առաջարկել են ի պահ դնել Գրականության ազգային թանգարանում, իսկ շենքում բացել ուկրաինացի կոմպոզիտոր Ալեքսանդր Կոշիցի թանգարանը։

Շենքը, որտեղ այժմ գտնվում է թանգարանը, կառուցվել է 1888-1889 թվականներին։ Բուլգակովներն այս տանը ապրել են 13 տարի՝ 1906-1919 թվականներին։

Ավելի վաղ Ուկրաինայի մշակույթի և տեղեկատվական քաղաքականության նախարարության փորձագիտական խորհուրդը քաղաքների ղեկավարներին խորհուրդ էր տվել վերանվանել այն փողոցները, որոնք կրում են ռուս հայտնի գործիչների անունները։