Նախագահ Դուդան հայտարարել է, թե ստույգ տեղեկություն չունեն՝ ում հրթիռներն են ընկել Լեհաստանի տարածքում

Լեհաստանը հստակ տեղեկություններ չունի, թե ում հրթիռներն են ընկել իր տարածքում։ Այս մասին լրագրողներին հայտնել է Հանրապետության Նախագահ Անջեյ Դուդան, փոխանցում է «Ռիա Նովոստի» գործակալությունը։

«Մենք հաստատ գիտենք, որ ամբողջ օրը շարունակվել է ռուսական հրթիռային հարձակումը Ուկրաինայի դեմ, Բայց այս պահին չունենք միանշանակ ապացույցներ, թե ով է արձակել այդ հրթիռը։ Կատարվում են քննչական գործողություններ»,- ասել է Դուդան։

Նշենք՝ Լեհաստանի ԱԳՆ-ն հայտարարություն էր տարածել, որ երեքշաբթի օրը ռուսական արտադրության հրթիռ է ընկել երկրի արևելքում գտնվող Լյուբլինի մարզի Պշևոդուվ գյուղի մոտ՝ Ուկրաինայի սահմանից շուրջ 5 կիլոմետր հեռավորության վրա: Զոհվել է 2 մարդ:

Ըստ աղբյուրի՝ Վարշավայում ՌԴ դեսպան Սերգեյ Անդրեևը կանչվել է ԱԳՆ։

Իր հերթին ԱՄՆ նախագահ Ջո Բայդենը նշել է, որ կան նախնական տեղեկություններ, որոնք վիճարկում են այն պնդումները, թե Լեհաստանում ընկած հրթիռը արձակվել է Ռուսաստանից։ «Նախնական տեղեկություններով՝ դա հերքվում է։ Ես չեմ ուզում դա ասել մինչև հետաքննության ամբողջական ավարտը, բայց հետագծի առումով քիչ հավանական է, որ այն գործարկվել է Ռուսաստանից։ Բայց մենք կտեսնենք», - ասել է նա լրագրողներին Բալիում։