Սպիտակում գայլը հարձակվել ու կծել է քաղաքացուն. Բժիշկը մանրամասներ է պատմում

Սպիտակ քաղաքի գազալցակայաններից մեկի տարածքում գայլը հարձակվել  ու կծել է քաղաքացուն։ 41-ամյա տուժած տղամարդը տեղափոխվել է հիվանդանոց։

Բժշկական կենտրոնում՝ վիրաբույժ Ֆրունզե Եղիյանի և հերթապահ բուժանձնակազմի կողմից անմիջապես ցուցաբերվել է առաջին բուժօգնություն։ Հետազոտությամբ տղամարդու ձեռքին ու մեջքի գոտկային շրջանում հայտնաբերվել է գայլի ատամի կծած վերք:

«Կատարվել է վերքերի մշակում, իրականացվեկ հակակատաղության դեմ պատվաստում։ Վիճակը կայունացել է, դուրս է գրվել՝  հետագա բուժումը շարունակելով ամբուլատոր պայմաններում»,-Panorama.am-ին  հայտնեց Սպիտակի ԲԿ-ի վիրաբուժության բաժանմունքի ղեկավար, վիրաբույժ Ֆրունզե Եղիյանը։

Բժիշկը հիշում է, որ մի 4-5 տարի առաջ էլ նման դեպք էր եղել սակայն տարածաշրջանի գյուղերից մեկում։

Քննարկումներից պարզ է դառնում, որ գազալցակայանում կենդանուն բռնել չի հաջողվել։ Նույն օրը մի գայլ հայտնվել է բնակիչներից մեկի բակում, որտեղ էլ սպանվել է։