Թաիլանդը հայտարարել է ԵԱՏՄ-ի հետ ազատ առևտրի համաձայնագրի շուրջ բանակցելու պատրաստակամության մասին

Թաիլանդը պատրաստ է բանակցություններ սկսել Եվրասիական տնտեսական միության (ԵԱՏՄ) հետ ազատ առևտրի համաձայնագրի կնքման շուրջ։ ՏԱՍՍ-ը հայտնում է, որ այդ մասին հինգշաբթի օրը հայտարարել է թագավորության արտաքին գործերի նախարարությունը՝ Թաիլանդում Բելառուսի դեսպան Վլադիմիր Բորովիկովի և թագավորության արտաքին գործերի նախարարության պաշտոնական ներկայացուցիչ Բուսադի Սանտիպիտակսի հանդիպման արդյունքներով տրված ասուլիսում։

«Երկու կողմերը քննարկել են երկկողմ համագործակցության զարգացման ուղիները փոխադարձ հետաքրքրություն ներկայացնող տարբեր ոլորտներում, մասնավորապես՝ առևտրի, ներդրումների և զբոսաշրջության ոլորտներում: Թայլանդական կողմը նաև պատրաստակամություն է հայտնել բանակցություններ սկսել Եվրասիական տնտեսական միության հետ ազատ առևտրի համաձայնագրի շուրջ և հայցել Բելառուսի աջակցությունն այս հարցում»,-ասված է ԱԳՆ հաղորդագրության մեջ։