Ինչ է հայտնի ավելի քան 180 մարդու կյանք խլած Ստեփանակերտի պայթյունի գործով

Ավելի քան 180 մարդու կյանք խլած պայթյունի հենց նույն օրը՝ սեպտեմբերի 25-ին հարուցվել է քրեական գործ։  Այս մասին Panorama.am-ի հետ զրույցում ասաց Արցախի Հանրապետության Քննչական կոմիտեի ներկայացուցիչ Ֆելիքս Հարությունյանը։

«Նշանակված են փորձաքննություններ։ Ընթացքի վերաբերյալ ավելի ուշ հակիրճ տեղեկատվություն կտրամադրենք։ Ինքներդ էլ հասկանում եք, թե ինչպիսի փորձաքննություններ պետք է իրականացվեն, բոլորը ստուգման փուլում են։ Հասկանում եք, թե ինչ իրավիճակ է»,-ասաց նա։

Ֆ. Հարությունյանի խոսքով, դեպքի վայրից կատարվել են անհրաժեշտ նմուշառումները։

Այս պահին ԱՀ ՔԿ ներկայացուցիչն այլ հարցերի չպատասխանեց՝ հորդորելով սպասել։ Հստակ չէ, թե որն է եղել պայթյունի պատճառը, դրա հետևանքով քանի՞ մարդ է զոհվել, վնասվածք ստացել, անհետ կորել։

Հիշեցնենք, որ սեպտեմբերի 25-ին Ստեփանակերտի վառելիքի պահեստում տեղի ունեցած աղետի տարածքում փրկարարական խմբերի իրականացրած որոնումների  արդյունքում սեպտեմբերի 29-ի դրությամբ  հայտնաբերվել և դատաբժշկական փորձաքննության բյուրո է տեղափոխվել ընդհանուր 170 աճյուն և մասունք։ Տարածքում հայտնաբերված  անձնական իրերը տեղեփոխվել են օպերատիվ շտաբ։

Աճյուններն ու մասունքները տեղափոխվել են Հայաստանի` ԴՆԹ միջոցով ինքնությունները պարզելու համար։

Հայտնի է, որ հայաստանյան ԲԿ-ներ տեղափոխված տուժածների թվում ևս մահվան դեպքեր են գրանցվել։ 

Հոկտեմբերի 6-ի կեսօրի տվյալներով՝  Արցախի ռազմական գործողությունների ու պայթյունի հետևանքով տուժած 309 մարդ գտնվում է երևանյան տարբեր ԲԿ-ներում։ Նրանցից 116-ի վիճակը գնահատվում է ծանր, 11-ի՝ ծայրահեղ ծանր։

Վերակենդանացման բաժանմունքներում են գտնվում հինգ երեխաներ, մինչ այդ երեք երեխաներ տեղափոխվել են բաժանմունքներ։