Բռնագաղթածներին օժանդակությունների ծրագրերը կնպաստեն պահանջարկի ավելացմանը. Մարտին Գալստյան

«Ծառայությունների մեջ աճն ավելի մեծ է, քան ակնկալում էինք։ Որոշակի անկում կա գյուղատնտեսության ոլորտում, բայց ակնկալում ենք, որ ՀՆԱ-ն բավականին բարձր կլինի»,-հրավիրված ասուլիսում ասաց ԿԲ նախագահ Մարտին Գալստյանը։

Անդրադառնալով բռնագաղթածների խնդրին՝ Գալստայանն ասաց, որ արցախյան վերջին զարգացումների արդյունքում կառավարությա օժանդակությունների ծրագրերը Հայաստանում կնպաստեն պահանջարկի ավելացմանը և պետք է քայլեր ձեռնարկել արցախցիներին արդյունաբերության և գյուղատնտեսության ոլորտում ինտեգրելու ուղղությամբ։

Ներկայացնելով ԿԲ խորհրդի որոշումը՝ Գալստյանն ասաց. «2023 թ. սեպտեմբերին 12-ամսյա գնաճն ավելացել է՝ ամսվա վերջին կազմելով 0.1%: 12-ամսյա բնականոն գնաճը շարունակել է նվազել և սեպտեմբերի վերջին կազմել է -0.1%»:

Նրա խոսքով՝ վերջին ամիսներին Հայաստանի հիմնական գործընկեր երկրներում դիտվում է ներքին պահանջարկի որոշակի արագացում և աշխարհաքաղաքական զարգացումներով պայմանավորված՝ համաշխարհային  տնտեսական աճի հետ կապված անորոշություններն ու միջազգային ապրանքահումքային շուկաներում տատանողականությունն ավելացել են:

Տեղեկացնելով, որ գործընկեր երկրներում 12-ամսյա գնաճը դեռևս պահպանվում է նպատակային ցուցանիշից բարձր մակարդակում՝ ԿԲ նախագահը կանխատեսեց, որ վերջիններիս կենտրոնական բանկերն առաջիկայում կշարունակեն վարել զսպող դրամավարկային քաղաքականություն, ինչի արդյունքում՝ արտաքին հատվածից ՀՀ տնտեսության վրա թույլ գնանկումային ազդեցությունները կպահպանվեն:

«Վերջին ամիսներին ՀՀ-ում դիտվում է սպասվածից բարձր տնտեսական ակտիվություն, որին շարունակում են նպաստել շինարարության և ծառայությունների ճյուղերի բարձր աճերը»,- հայտնեց Գալստյանը և նշեց, որ դրան զուգահեռ տնտեսությունում շարունակում է ընդլայնվել ներքին պահանջարկը, իսկ արտաքին հատվածից թույլ գնանկումային ազդեցությունների և իրականացված զսպող դրամավարկային քաղաքականության պայմաններում պահպանվում է ցածր գնաճային միջավայր, ինչն արտահայտվում է նաև աշխատանքի շուկայում աշխատավարձերի աճի տեմպի դանդաղմամբ: 

Ներկայացնելով ԿԲ խորհրդի որոշումը՝ Մարտին Գալստյանը հայտնեց, որ ստեղծված իրավիճակում ԿԲ խորհուրդը նպատակահարմար է գտնում նվազեցնել քաղաքականության տոկոսադրույքը:

«Դրամավարկային քաղաքականության նախանշված սցենարում 12-ամսյա գնաճն առաջիկայում կպահպանվի նպատակային ցուցանիշից ցածր մակարդակում, այնուհետև աստիճանաբար կավելանա և միջնաժամկետում կկայունանա նպատակային 4% ցուցանիշի շուրջ»,- հայտնեց Գալստյանը։