Լեմկինի ինստիտուտը խստորեն դատապարտում է Վագիֆ Խաչատրյանի նկատմամբ Ադրբեջանի կիրառված պատիժը

Լեմկինի անվան ցեղասպանության կանխարգելման ինստիտուտը խստորեն դատապարտում է 2023 թվականի նոյեմբերի 7-ին Ադրբեջանի կողմից արցախաբնակ 68-ամյա Վագիֆ Խաչատրյանի նկատմամբ կայացված դատավճիռը։

Հիշեցնենք, որ շտապ վիրահատության նպատակով Երևան մեկնող Վագիֆ Խաչատրյանը հուլիսի 29-ին առևանգվել էր դստեր և ԿԽՄԿ-ի աշխատակիցների աչքի առաջ՝ մեղադրել 1991թ.-ին կազմակերպած ինչ-որ ջարդերի մեջ, կազմակերպվեց կոպիտ դատական ֆարս և նոյեմբերի 7-ին Բաքվի դատարանը Խաչատրյանին դատապարտել է 15 տարվա ազատազրկման։

Լեմկինի ինստիտուտը կոչ է անում միջազգային հանրությանը համոզել Ալիևի վարչակարգին անհապաղ ազատ արձակել իր իրավասության տակ գտնվող բոլոր հայերին և ձեռնպահ մնալ Բաքվին որևէ օգնություն տրամադրելուց, որը կարող է սրել Արցախում ցեղասպանության զոհերի տառապանքը կամ խրախուսել Ադրբեջանին կատարել որևէ անօրինական ագրեսիայի ակտ:

«Օրենքը հաճախ ծառայում է իշխանության ղեկին գտնվողներին լեգիտիմացնելուն, հատկապես բռնատիրական այնպիսի ռեժիմներին, ինչպիսին է ղեկավարում է Ադրբեջանի նախագահ պարոն Իլհամ Ալիևը։

Հաշվի առնելով պարոն Խաչատրյանի տարիքը և առկա սրտային հիվանդությունը, որի պատճառով 2023 թվականի հուլիսի 29-ին նա շտապ տարհանվել է Արցախից, նրա 15 տարվա ազատազրկումը նշանակում է մահապատիժ՝ թաքնված արտաքին անմեղ շղարշով, որի հետևում ռեժիմի ակնհայտ ռեպրեսիվ և ցեղասպանական քաղաքականությունն է»,- ասվում է հայտարարության մեջ։

Լեմկինի ինստիտուտը ևս մեկ անգամ հիշեցնում է Արցախի ութ բարձրաստիճան պաշտոնյաների՝ շարունակվող անօրինական բանտարկությունը, ինչպես նաև Բաքվի կողմից տասնյակ, հնարավոր է, հարյուրավոր հայ խաղաղ բնակիչների և ռազմագերիների կալանավորման փաստերը, որոնք շուտով կարող են նույն ճակատագիրը ունենալ, ինչ պարոն Խաչատրյանը, եթե ոչ ավելի վատ:

«Կրկին ու կրկին Ադրբեջանը ցույց է տվել, որ մերժում է օրենքների վրա հիմնված միջազգային կարգը, ներառյալ միջազգային մարդասիրական իրավունքով և մարդու իրավունքների մասով ստանձնած պարտավորությունները»,-ասվում է հայտարարության մեջ: