Մոլդովայի խորհրդարանը չեղարկել է ԱՊՀ-ի հետ ահաբեկչության դեմ պայքարի համաձայնագիրը

Մոլդովայի խորհրդարանը երկրորդ ընթերցմամբ դրական եզրակացություն է տվել ԱՊՀ անդամ պետությունների իրավասու մարմինների կրթական հաստատություններում հակաահաբեկչական ստորաբաժանումների մասնագետների պատրաստման ոլորտում համագործակցության մասին համաձայնագրի չեղարկմանը։ ՏԱՍՍ-ը հայտնում է, որ այդ որոշումը պաշտպանել են իշխող Գործողություն և համերաշխություն կուսակցության պատգամավորները, ընդդիմադիր Կոմունիստների և սոցիալիստների դաշինքը չի քվեարկել՝ ի նշան բողոքի լքելով նիստերի դահլիճը։

«Երկրորդ ընթերցմամբ հաստատվել է ԱՊՀ-ի հետ հակաահաբեկչական ստորաբաժանումների մասնագետների պատրաստման ոլորտում համագործակցության մասին համաձայնագրի չեղարկումը: Փաստաթուղթը ստորագրվել է 2012 թվականի դեկտեմբերի 5-ին»,-ասվում է խորհրդարանի կայքում տեղադրված հաղորդագրության մեջ:

Այս տարի Մոլդովայի խորհրդարանը չեղարկել է ԱՊՀ շրջանակներում կնքված ավելի քան 10 համաձայնագրեր։