2022 թվականին ընտանեկան բռնության զոհ է դարձել 244 հազար ֆրանսուհի.Մակրոն

Ֆրանսիայի նախագահ Էմանուել Մակրոնը Կանանց նկատմամբ բռնության դեմ պայքարի միջազգային օրվա կապակցությամբ X սոցցանցում հրապարակված տեսանյութում ասել է, որ բռնությունների դեմ պայքարը շարունակվելու է, և դրան վերջ կտրվի։

«Կանայք ամեն օր ենթարկվում են ճնշումների, բռնությունների, ստորացման, ամեն օր հարվածներ են հասցվում, կյանքեր են կործանվում... Մենք կարող ենք դրան վերջ տալ, պետք է վերջ տանք, և մենք կանենք»,-«ՌԻԱ նովոստի»-ն մեջբերում է նրա խոսքերը։

Նրա խոսքով՝ 2022 թվականին ընտանեկան բռնության զոհ է դարձել 244 հազար ֆրանսուհի, ինչը երկու անգամ ավելի է, քան 2017 թվականին։

«Այս թվերը ցույց են տալիս, որ կանայք ավելի ազատ են դարձել այդ մասին խոսելու հարցում: Սա լավ է, բայց դա չի փոխում այն փաստը, որ 2022 թվականին իրենց զուգընկերների ձեռքով 118 կին է մահացել»,- ասաց նա: