Ֆրանսիայում չեն ցանկանում Փարիզի Աստվածամոր տաճարի վիտրաժները փոխարինել ժամանակակից նկարիչների գործերով

Ֆրանսիայի նախագահ Էմանուել Մակրոնի՝ Փարիզի Աստվածամոր տաճարի վիտրաժները ժամանակակից աշխատանքներով փոխարինելու ծրագրերը հասարակական սուր քննադատության են արժանացել։ Նախագահն առաջարկել է 2019 թվականի հրդեհից փրկված բնօրինակ վիտրաժները տեղափոխել նոր թանգարան, որը նվիրված է Նոտր Դամի վերականգնմանը:

artguide.com-ի հաղորդմամբ, նա նաև առաջարկել է հրավիրել ֆրանսիացի ժամանակակից արվեստագետներին՝ ներկայացնելու վիտրաժների տարբերակներ։

Սակայն La Tribune de l'Art առցանց ամսագիրը Մակրոնի ծրագրերի դեմ ստորագրահավաք է սկսել։

«Ո՞վ է տվել պետության ղեկավարին մանդատը վերակառուցելու ոչ թե իրեն, այլ բոլորին պատկանող տաճարը»,- ասվում է խնդրագրում, որն այս պահին ստորագրել է մոտ 130 հազար մարդ։

Նոտր Դամը նախատեսվում է բացել 2024 թվականի դեկտեմբերի 8-ին, սակայն վերանորոգման աշխատանքները կշարունակվեն մինչև 2028 թվականը։