Սյունիքում ռուս սահմանապահների կողմից ճանապարհ հսկելը երազանքների դաշտից է. Պապոյան

«Այդ հայտարարության մեջ կետ չկա, որ ռուսները պետք է գան, այդտեղ ինչ-որ բան վերահսկեն: Նման կետ գոյություն չունի»,- ԱԺ-ում լրագրողների հետ զրույցում ասաց ՔՊ-ական պատգամավոր Գևորգ Պապոյանը՝ անդրադառնալով լրագրողի դիտարկմանը, որ նոյեմբերի 9-ի հայտարարության 9-րդ կետն ենթադրում է, որ Սյունիքով անցնող ճանապարհը պետք է ռուսական սահմանապահների կողմից վերահսկվի։ 

Նա նշեց, որ այդ կետի համաձայն՝ Հայաստանն ընդամենը պետք է ճանապարհ տրամադրի և Հայաստանը պատրաստ է դա տրամադրել. «Հիմա էլ պատրաստ ենք տրամադրել ճանապարհը մեր օրենսդրությանը համապատասխան»:

«Երկրորդ, նոյեմբերի 9-ի հայտարարության մեջ մի կետ կա՞, որտեղ ՌԴ-ն ու Ադրբեջանը ինչ-որ բան պարտավորվել էին անել և արել են: Չկա այդպիսի կետ: Այն բոլոր կետերը, որ պետք է իրենք անեին, չեն արել:

Մենք չենք խախտում այդ հայտարարությունը, որովհետև 9-րդ կետում չկա այն ձևակերպումը, որ դուք տվեցիք: Դա ցանկությունների, երազանքների դաշտից է, այդպես չի կարելի մեկնաբանել, որովհետև նման բան այնտեղ չկա գրված։

Առհասարակ նոյեմբերի 9-ի հայտարարությանը հղում անելուց առաջ թող բոլոր մարդիկ վերադառնան ԼՂ, թող ադրբեջանցիները դուրս գան այդ տարածքներից, թող միջանցքը մնա, Ռուսաստանը թող իր խաղաղապահներով միջանցքում և մնացած տարածքներում իրականացնի իր գործառույթները և այդպես շարունակ: Նոյեմբերի 9-ի հայտարարությունում նման կետեր կան, բայց ձեր նշած կետը գոյություն չունի»,- ասաց  ՔՊ-ական պատգամավորը։

Նա նաև նշեց, որ  մինչև Ադրբեջանում ընտրությունների ավարտը դժվար թե Հայաստանի և Ադրբեջանի ղեկավարների միջև հանդիպում լինի։