Փաշինյանը բացատրեց, թե ինչ նկատի ունի չորրորդ հանրապետություն ասելով

«Ես ինչ նկատի ունեմ ասելով չորրորդ հանրապետություն։ Ներքին իմաստով նկատի ունեմ  ընդունված նոր Սահմանադրություն, ոչ թե սահմանադրության փոփոխություն, որն ընդունվել է ժողովրդի կողմից և բոլորը, ովքեր նույնիսկ դեմ են քվեարկել, ընդունում են, որ մեծամասնությունը կողմ է քվեարկել»,- Ազգային ժողովում կառավարության հետ հարցուպատասխանի ժամանակ ասաց Նիկոլ Փաշինյանը։

Նա նշեց, որ նույնիսկ չի քննարկի այն հարցը, որ ասում են՝ «այ, իշխանությունը պատրաստվում է  կեղծիք անել, սահմանադրական հանրաքվե կեղծել և այլն»։

«Մեր կառավարման օրոք Հայաստանում ոչ մի ընտրակեղծիք տեղի չի ունեցել, ոչ մի մակարդակում։ Եթե նույնիսկ մեր կառավարման օրոք ինչ-որ մեկը խնդիր դնի կեղծել ընտրություն, գրեթե համոզված եմ, որ նույնիսկ մենք չենք կարող անել նման բան որոշելու դեպքում։ Իսկապես եմ ասում»,- ասաց Փաշինյանը։

Նա նշեց, որ կառավարությունը, կառավարող քաղաքական ուժը չունի սեղանին դնելու փաթեթ ու ասի՝ սա է առաջարկում. «Դա  վատ չէ, ընդհակառակը լավ է, կարծում եմ՝ նախ հանրության մեջ  պետք է տեղի ունենա քննարկում, թե ինչի մասին է, ինչի համար է։ Կարևոր եմ համարում նախ  խոսակցություն տեղի ունենա, ըմբռնում ձևավորվի, որ դա կարևոր է, պետք է անել, հետո նոր անցնել բովանդակությունը։

Կարող եմ հետևյալն ասել. ավանդույթ կա, որ փորձ է  արվում սահմանադրությունները հարմարեցնել կամ գործող կառավարությանը, գործող ղեկավարին, կառավարող թիմին։ Մեր մտադրություններն այդպիսին չեն, չեն կարող լինել։ Դրա անհրաժեշտությունն ուղղակի չկա»։