Նախագծով նախատեսվում է տնտեսվարողի մոտ հարկային հսկողության ընթացքը բացահայտ կերպով տեսաձայնագրել. Ռուստամ Բադասյան

«Այս նախագծով հնարավորություն է տրվում հարկային վարչարարության ընթացքը և արդյունքների արձանագրումը տեսաձայնագրել»,- ԱԺ-ում ասաց ՊԵԿ նախագահ Ռուստամ Բադասյանը՝ ներկայացնելով Հարկային օրենսգրքում փոփոխություններ և լրացումներ կատարելու մասին նախագիծը։

Նրա տեղեկացմամբ՝ ՊԵԿ-ը տարբեր հարկային հսկողություններ է իրականցանում հսկիչ գնումների, չգրանցված աշխատողների ստուգումների, դրոշմապիտակների առկայության ստուգումների ուղղությամբ։

«Հաճախ նաև հետագա դատական բողոքարկման փուլում առաջանում է ապացույցների և առհասարակ հարկային մարմինների գործունեության օրինականության ապացուցման հարց, նաև այդ հսկողական միջոցառումների արդյունավետությունը գնահատելու նպատակ, դրա համար այս նախագծով կարգավորումներ են տրված, որով հնարավորություն է տրվում հարկային հսկողության ընթացքը բացահայտ կերպով տեսաձայնագրել, որպեսզի հետագայում թե՛ արդյուանվետությունը ՊԵԿ-ը կարողանա գնահատել, թե՛ բողոքարկման ժամանակ խնդիրներ չառաջանան»,-ասաց ՊԵԿ նախագահը։

Նա հայտնեց, որ փաթեթից դուրս է բերվել «Առևտրի և ծառայությունների մասին» օրենքում փոփոխություններ կատարելու մասին նախագիծը, որով նախատեսվում էր, որ տնտեսվարողները պետք է տեսահսկման որոշակի համակարգ իրականացնեն առևտրի իրականացման վայրում։