Մարզահամերգային համալիրը գերակատարել է պլանավորած շահույթ

«Կարեն Դեմիրճյանի անվան մարզահամերգային համալիր» ՓԲԸ-ն 2023 թվականին արձանագրել է 106 մլն դրամ զուտ շահույթ, որը 51%-ով ավելի է 2022 թ․-ի համեմատ։ Պլանավորված շահույթը գերակատարվել է շուրջ 40 մլն դրամով։

Պետքույքի կառավարման կոմիտեից հայտնում են, որ նման տվյալներ են հրապարակվել ընկերության  2023 թվականի տարեկան ժողովի ընթացքում։

Անցած տարվա ընթացքում համալիրում կայացել է 119 տեղական և միջազգային սպորտային, մշակութային միջոցառումներ, համաժողովներ, ցուցահանդեսներ, որոնցից ստացվել է շուրջ 560 մլն դրամի եկամուտ։

Օրակարգում ընդգրկված հարցերը վերաբերել են ընկերության տարեկան հաշվետվությանը, հաշվապահական հաշվեկշռին, շահույթին և վնասի հաշվին, շահութաբաժնի վճարման մասին որոշման ընդունմանը, տարեկան շահութաբաժնի չափին, շահույթներին և վնասների բաշխմանը։

Տարեկան ժողովի ընթացքում քննարկվել է նաև մարզահամերգային համալիրի 5-ամյա ծրագիրը, որի իրականացման արդյունքում կվերակառուցվեն հիմնական ենթակառուցվածքները։