Հաստատվեց ԵՀ-ից 15 մլն եվրո Արցախից բռնագաղթածների կարիքների համար հատկացնելու համաձայնագիրը

«15 մլն եվրո ընդհանուր արժողությամբ այս ծրագրի  նպատակն է աջակցել Հայաստանի սոցիալ տնտեսկան դիմակայունությանը, մասնավորապես նպաստել ԼՂՀ-ից բռնի տեղահանված անձանց առաջնահերթ միջնաժամկետ և երկարաժամկետ խնդիրների հասցեագրմանը»,-կառավարության նիստում հայտնեց փոխվարչապետ Մհեր Գրիգորյանը։

Նա զեկուցեց «Հայաստանի Հանրապետության և Եվրոպական հանձնաժողովի միջև «Պետության և դիմակայունության ամրապնդման պայմանագիր Հայաստանի Հանրապետության համար» ֆինանսավորման համաձայնագիրը հաստատելու մասին» Հանրապետության նախագահի հրամանագրի նախագիծը։

«Ծրագրի շրջանակներում նախատեսվում է միանվագ բազմանպատակ դրամական օգնության տրամադրում՝ աջակցություն ժամանակավոր կացարանների կարիքների ու կոմունալ ծախսերի ուղղությամբ, աջակցություն կանանց ու խոցելի խմբերին, ինչպես  նաև հյուրընկալող համայնքների սոցիալ-տնտեսական վերականգնմանը»,- մանրամասնեց Գրիգորյանը։

Նա հայտնեց, որ չզեկուցվող նախագծերի փաթեթում ընդունվել է նաև նախագիծ, որով ԵՄ-ն Հայաստանին կհատկացնի ևս 3 միլիոն եվրո, որի նպատակն է աջակցել ՀՀ կառավարությանը առավել լայն բարեփոխումների գործընթացում և ԼՂ-ից բռնի տեղահանված անձանց  հետագա սոցիալ-տնտեսական ներառմանը։