Էրդողանը կմասնակցի Կազանում կայանալիք ԲՐԻԿՍ-ի գագաթնաժողովին. ԶԼՄ-ներ

Թուրքիայի նախագահ Ռեջեփ Թայիփ Էրդողանը Կազանում կմասնակցի ԲՐԻԿՍ-ի գագաթնաժողովին։ ՏԱՍՍ-ի հաղորդմամբ, այս մասին գրում է թուրքական հեռուստաալիքը՝ հղում անելով Թուրքիայի ղեկավարի վարչակազմի աղբյուրներին։

Ավելի վաղ Bloomberg-ը, վկայակոչելով աղբյուրներին, հայտնել էր, որ թուրքական իշխանությունները ԲՐԻԿՍ-ին միանալու դիմում են ներկայացրել մի քանի ամիս առաջ։ Գործակալության տվյալներով, ասոցիացիայի ընդլայնման հարցը կարող է քննարկվել հոկտեմբերի 22-24-ը Կազանում կայանալիք նրա գագաթնաժողովում, որտեղ հրավիրված է Էրդողանը։

Ռուսաստանի նախագահի օգնական Յուրի Ուշակովը չորեքշաբթի լրագրողներին ասել է, որ Թուրքիան ԲՐԻԿՍ-ին միանալու դիմում է ներկայացրել, և այն կքննարկվի։

Թուրքիայի իշխանությունները դեռ չեն հաստատել թուրական լրատվամիջոցների հաղորդագրությունը։ 

Հիշեցնենք, որ այսօր ԱԺ-ում լրագրողների հետ զրույցում ԱԳ փոխնախարար Մնացական Սաֆարյանն ասել էր, որ Հայաստանը մասնակցելու է ԲՐԻԿՍ-ի գագաթնաժողովին։