559 հազար երեխա Գազայում պատվաստվել է պոլիոմելիտի դեմ

Մոտ 559 հազար երեխա պատվաստվել է պոլիոմիելիտի դեմ մի քանի օր տևած պատվաստման շավի ընթացքում։ ՏԱՍՍ-ի փոխանցմամբ, այդ մասին հայտնում է Պաղեստինի տարածքներում Իսրայելի կառավարության գործողությունների համակարգման գրասենյակը։

«Արշավի ընթացքում Գազայի հատվածում պատվաստվել է 559 հազար երեխա»,- ասվում է հայտարարության մեջ։ Գերատեսչության տվյալներով՝ վերջին 24 ժամվա ընթացքում անկլավի հյուսիսում պատվաստվել է մոտ 6,4 հազար երեխա։

Երեխաների պոլիոմիելիտի պատվաստման արշավը սկսվել է Գազայի հատվածում սեպտեմբերի 1-ին, որը համակարգում են Առողջապահության համաշխարհային կազմակերպությունը, ՄԱԿ-ի մանկական հիմնադրամը և Մերձավոր Արևելքում Պաղեստինի փախստականների օգնության և աշխատանքի գործակալությունը:

Օգոստոսի 16-ին Պաղեստինի առողջապահության նախարարությունը հայտարարեց, որ կենտրոնական Գազայի հատվածում գրանցվել է պոլիոմիելիտի առաջին հաստատված դեպքը։ Դեյր էլ-Բալահ քաղաքում տասը ամսական երեխան, որը պոլիոմիելիտի պատվաստանյութի ոչ մի չափաբաժին չէր ստացել, վարակվել էր վիրուսային վարակով, նրա ախտորոշումը հաստատվել էր Ամմանում լաբորատոր հետազոտությունների ժամանակ։