Գուրոսը՝ Գորիսում

Գորիսի համայնքային պատկերասրահում հոկտեմբերի 11-ին տեղի կունենա «Գուրոս․ Սյունիքը վավերագրողը» ցուցահանդեսի բացումը։

«Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի ֆոնդերում պահվող արվեստագետ Գուրոսի՝ Գուրգեն Պարոնյանի սևանկարների հավաքածուից ավելի քան 100 լուսանկար է ներկայացվելու ցուցադրությանը։

ՊՈԱԿ-ից հայտնում են, որ դրանց մի մասը երբևէ չհրապարակված բացառիկ պատկերներ են, որոնք կարևոր տեղեկություններ են պարունակում Սյունիքի բնության ու հուշարձանների, բնակավայրերի ու բնակչության մասին:

Բացառիկ գիտաճանաչողական արժեք ներկայացնող հավաքածուում ընդգրկված պատկերները հնարավորություն են տալիս տեսնել Գորիսի տարածաշրջանի քարանձավային բնակավայրից դեպի կանոնավոր փողոցներով, քարաշեն, երկհարկանի առանձնատներով բնակավայրի աստիճանական զարգացումը:

Ցուցադրությունը բաց է լինելու մինչև նոյեմբերի 15-ը։