Մոսկվան և Բաքուն խափանեցին ռուս դիվանագետի դեմ ԱՄՆ սադրանքը. Նարիշկին

Ռուսաստանի և Ադրբեջանի հատուկ ծառայությունները կանխել են ամերիկացիների կողմից ռուս դիվանագետի դեմ սադրանքը։ «ՌԻԱ նովոստի»-ն գրում է, որ այդ մասին Բաքու կատարած այցի ժամանակ հայտարարել է Արտաքին հետախուզության ծառայության ղեկավար Սերգեյ Նարիշկինը։

«Վերջերս մենք նկատում ենք արտերկրում մեր երկրների կառույցների և քաղաքացիների նկատմամբ դիվերսիոն գործողությունների աճ, որպես օրինակ կարող եմ ասել, որ վերջերս Ադրբեջանի և Ռուսաստանի հատուկ ծառայությունների համատեղ ջանքերով մեզ հաջողվեց կանխել ռուս դիվանագետներից մեկի դեմ՝ ամերիկացիների սադրիչ սպառնալիքը»,- ասաց նա՝ պատասխանելով լրագրողների հարցերին։

Նարիշկինը նշել է, որ Մոսկվան և Բաքուն դիմակայում են բազմաթիվ սպառնալիքների և մարտահրավերների։ Դրանց թվում են միջազգային ահաբեկչությունը, անօրինական միգրացիան, զենքի և թմրանյութերի ապօրինի շրջանառությունը, ինչպես նաև առանձին պետական կառույցների և ոչ կառավարական կազմակերպությունների դիվերսիոն գործունեությունը, որոնք փորձում են ազդել Ռուսաստանի և Ադրբեջանի ներքին քաղաքականության վրա։ Նրա խոսքով, այդ ուժերը դժգոհ են նրանից, որ երկու երկրներն էլ իրենց անկախ ու ինքնիշխան են պահում։