Բաքուն Թեհրանին բողոք է հայտնել Իրանում Ալիևին և Էրդողանին վիրավորելու համար

Ադրբեջանում Իրանի Իսլամական Հանրապետության գործերի ժամանակավոր հավատարմատար Սեյիդ Ջաֆար Աղայի Մարիանը կանչվել է արտաքին գործերի նախարարություն։

Ըստ գերատեսչության հրապարակման՝ պատճառը Ադրբեջանի և նախագահ Իլհամ Ալիևի հասցեին վիրավորական հայտարարություններն են, որոնք արվել են 2024 թվականի դեկտեմբերի 29-ին Արդաբիլում կայացած միջոցառմանը՝ Իրանի գերագույն առաջնորդի ներկայացուցիչ այաթոլլա Սեյյեդ Հասան Ամելիի մասնակցությամբ։

Ելույթը հեռարձակվել է Իրանի ռադիո-հեռուստատեսության կազմակերպության ալիքներից մեկով։

«Ադրբեջանական կողմը խիստ բողոք է հայտնել Իրանին՝ կապված այս միջադեպի հետ, նաև դժգոհություն է արտահայտվել վերջերս Իրանի բնակչության շրջանում ակնհայտ հակաադրբեջանական տրամադրությունների բորբոքման կապակցությամբ։

ԱԳՆ-ում դիվանագետին ասել են, որ հակաադրբեջանական քարոզչությունը հակասում է երկկողմ հարաբերությունների ոգուն, երկրների առջև ծառացած նպատակներին ու խնդիրներին»,-ըստտ ադրբեջանական ԶԼՄ-ների ասվում է տարածված հաղորդագրության մեջ։

Ադրբեջանական կողմը պահանջել է դադարեցնել իր դեմ նման «սադրանքները» երկրի դեմ։

Երեկ Իրանի պետական հեռուստատեսությունը հեռարձակել է Արդաբիլում տեղի ունեցած արարողությունը, որին մասնակցել են պետական պաշտոնյաներ։ Միջոցառմանը վիրավորական արտահայտություններ են հնչել Ադրբեջանի և Թուրքիայի նախագահներ Իլհամ Ալիևի և Ռեջեփ Թայիփ Էրդողանի հասցեին։