Մահացել է Ժան Մարի Լը Պենը

96 տարեկան հասակում մահացել է «Ազգային ճակատ» կուսակցության (այժմ վերածված «Ազգային միավորում») հիմնադիր Ժան Մարի Լը Պենը։ Այս մասին հայտնում է Agence France-Presse-ը՝ հղում անելով քաղաքական գործչի ընտանիքին։

«Ժան Մարի Լը Պենը երեքշաբթի ժամը 12:00-ին ընտանիքի անդամների ներկայության պայմաններում հեռացավ Աստծո մոտ»,- նրա ընտանիքի հայտարարությունը մեջբերում է լրատվական գործակալությունը։

Հստակեցվում է, որ իր մահվան օրը Լը Պենը գտնվել է Գարշ կոմունայի (Օ դը Սեն դեպարտամենտ) բժշկական հաստատությունում, որտեղ նրան տեղափոխել են մի քանի շաբաթ առաջ։ Նրա դուստրը՝ Մարին Լը Պենը, ով ներկայումս գլխավորում է «Ազգային միավորում» խորհրդարանական խմբակցությունը, նրա մահվան օրը այցով գտնվում էր Մայոտում (Ֆրանսիայի անդրծովյան դեպարտամենտ): Նախկինում լրատվամիջոցներում բազմիցս տեղեկություններ էին հայտնվել նրա հոսպիտալացման մասին, սակայն հետո ընտանիքը հերքել էր նրա ծանր վիճակի մասին լուրերը՝ պնդելով, որ խոսքը բժշկական հետազոտության մասին է։