Լուկաշենկոն հավանություն է տվել ԵԱՏՄ պայմանագրի փոփոխությունների նախագծին

Բելառուսի նախագահ Ալեքսանդր Լուկաշենկոն հավանություն է տվել Եվրասիական տնտեսական միության մասին պայմանագրի (ԵԱՏՄ) փոփոխությունների մասին արձանագրության նախագծին։ Այս մասին հայտնել է պետության ղեկավարի մամուլի ծառայությունը։

Նշվում է, որ Բելառուսի ղեկավարը համապատասխան հրամանագիրը ստորագրել է հունվարի 11-ին։ Փաստաթուղթը հաստատվել է որպես բանակցությունների հիմք։

«Հաստատել 2014 թվականի մայիսի 29-ի Եվրասիական տնտեսական միության մասին պայմանագրում փոփոխություններ կատարելու մասին արձանագրության նախագիծը՝ որպես բանակցությունների հիմք»,- Վեստի.ռու-ի հաղորդմամբ, ասված է փաստաթղթում։

Մամուլի ծառայությունից պարզաբանել են, որ փոփոխությունները կանդրադառնան մաքսային, առևտրի, մրցակցության, պետական գնումների, տրանսպորտի հսկողության, տեխնիկական կանոնակարգերի և էներգետիկայի ոլորտներում կարգավորման հարցերին։

Նշվում է նաև, որ արձանագրության նախագծի նախապատրաստումն անհրաժեշտ է ԵԱՏՄ-ի մասին պայմանագրի թարմացման համար։