Պակիստանում գերմանական հետախուզության աշխատակցին մահացած են գտել

Պակիստանում Գերմանիայի դեսպանատան աշխատակցին, որը աշխատում էր Գերմանիայի Դաշնային հետախուզական ծառայությունում (BND), Իսլամաբադում գտնվող իր բնակարանում մահացած են գտել։ Այդ մասին հայտնում է Bild պարբերականը։

«Գերմանացի դիվանագետն անհետացել է Պակիստանում, և երկու օր անց դեսպանատան աշխատակիցները նրան մահացած են գտել Իսլամաբադում գտնվող իր բնակարանում: Ըստ Bild-ի՝ Թոմաս Բ.-ն աշխատել է դեսպանատանը, բայց ոչ թե Գերմանիայի արտաքին գործերի նախարարությունում, այլ դաշնային հետախուզության ծառայությունում»,-գրում է տաբլոիդը։

Թոմաս Բ.-ն երկու օր չի ներկայացել դեսպանատուն և չի պատասխանել զանգերին, ուստի գործընկերները գնացել են նրա տուն, որտեղ նրան գտել են մահացած: Նշվում է, որ նա ապրել է քաղաքի հատուկ պահպանվող տարածքում, որտեղ գտնվում են բազմաթիվ դիվանագետների բնակարաններ։

Ըստ Bild-ի Մահացածը սրտի հետ կապված խնդիրներ ուներ, որոնք կարող էին նրա մահվան պատճառ լինել։ Թոմաս Բ.-ն 3,5 տարի աշխատել է որպես դեսպանատան խորհրդական:

«Ցավոք, մենք ստիպված ենք հաստատել մեր գործընկերոջ մահը»,-«ՌԻԱ նովոստի»-ի փոխանցմամբ, հայտնել են Գերմանիայի ԱԳՆ-ից։

Գերմանիայի Դաշնային հետախուզական ծառայությունը հրաժարվել է մեկնաբանել դեպքը: Bild-ը գրում է, որ մահացածը երկար տարիներ աշխատել է հետախուզության համար և համարվում էր փորձառու աշխատակից։