Միասին կանցնենք կատարողական արվեստի գաղտնիքների բացահայտման մի հետաքրքիր ճանապարհ. Նարեկ Հախնազարյան

Երևանի քաղաքապետարանի նախաձեռնությամբ մեկնարկում է «Արտիստը՝ դպրոցին» ծրագրի 2025 թվականի շրջափուլը: Քաղաքապետարանից հայտնում են, որ փետրվարի 1-ից մարտի 3-ը անվանի թավջութակահար, ՀՀ վաստակավոր արտիստ Նարեկ Հախնազարյանը վարպետության դասերով հանդես կգա Երևանի ենթակայության բոլոր երաժշտական և արվեստի դպրոցներում:

Վարպետության դասերը կավարտվեն «Արամ Խաչատրյան» համերգասրահում կայանալիք եզրափակիչ գալահամերգային ծրագրով, որի ընթացքում Նարեկ Հախնազարյանի հետ ելույթ կունենան մայրաքաղաքի երաժշտական և արվեստի դպրոցների լավագույն թավջութակահարները:

«Մենք միասին կանցնենք կատարողական արվեստի գաղտնիքների բացահայտման մի հետաքրքիր ճանապարհ, որի ավարտին Արամ Խաչատրյան համերգասրահում հանդես կգանք եզրափակիչ գալահամերգային ծրագրով։ 

Անհամբեր սպասում եմ մեր հանդիպմանը շատ շուտով»,- ասում է Նարեկ Հախնազարյանը։