Մեկնարկել է Հռոմի Պապի հրաժեշտի արարողությունը

Վատիկանի՝ Սուրբ Մարթայի տանը մեկնարկել  է երեկ կյանքից հեռացած Հռոմի Պապի հոգեհանգստի արարողությունը։ Սուրբ Աթոռի պաշտոնական ԶԼՄ-ները հրապարակել են առաջին կադրերը։

Ֆրանցիսկոս Պապին առաջինը հրաժեշտ են տալիս Կուրիայի, Վատիկանի աշխատակիցները, նրա օգնականները և սպասարկող անձնակազմը։

Չորեքշաբթի օրը դագաղը պետք է դրվի Սուրբ Պետրոսի բազիլիկում՝ հանրային հիշատակի արարողության համար։ Այն կտևի երեք օր։

Ակնկալվում է, որ  հուղարկավորությունը տեղի կունենա շաբաթ օրը՝ ապրիլի 26-ին։ Վատիկանի կանոնների համաձայն՝ պոնտիֆիկոսը պետք է հուղարկավորվի մահից 4-6 օր հետո։

Մի շարք երկրների առաջնորդներ արդեն հայտարարել են հուղարկավորությանը մասնակցելու իրենց մտադրության մասին, այդ թվում՝ ԱՄՆ նախագահ Դոնալդ Թրամփը և Ֆրանսիայի նախագահ Էմանուել Մակրոնը։

Ֆրանցիսկոսը, իր իսկ խնդրանքով, կհուղարկավորվի Սանտա Մարիա Մաջորեի (Մեծ Աստվածամայր) բազիլիկայում։ Պոնտիֆիկոսի կտակը հրապարակվել է երեկ։ Դրա համաձայն, հուղարկավորության ծախսերը հոգացել  է բարերարը։