Հայաստանը դիկտատուրայի վերածած Փաշինյանի համար հայկական իշխանության թագը չափազանց մեծ է. Արա Պողոսյան

Քաղաքագետ Արա Պողոսյանը գրում է.

«Այսօր Վերաքննիչ դատարանը Սամվել Կարապետյանի ձերբակալությունը ճանաչեց ոչ իրավաչափ: Խոսքը առայժմ իհարկե ձերբակալության մասին է, և ո'չ կալանավորման, սակայն այս փաստը ևս ապացուցում է գործարար Սամվել Կարապետյանի քաղաքական բանտարկյալ լինելու հանգամանքը։

Ակնհայտ է, ներկա քաղաքական իրավիճակում Փաշինյանին անհրաժեշտ է հնարավորինս հանդարտ իրավիճակ և կաշկանդված ընդդիմադիր բանավեճ, ինչը հնարավորություն կտա Փաշինյանին վաշինգտոնյան շոուն «վաճառել» հայ ժողովրդի վրա իբրև խաղաղության եւ բարգավաճման խոստում։ Այնինչ կարծում եմ յուրաքանչյուրին է պարզ (եթե ունի առողջ մտածողություն), որ ցանկացած փաստաթուղթ ունի երեւացող ու չերևացող կողմեր, որոնք հաճախ հակադիր են։ Յուրաքանչյուր ոք պետք է իմանա, որ խաղաղություն թղթով չեն բերում, այլ անմնացորդ նվիրումով և անդադրում աշխատանքով, ինչը իհարկե այս իշխանության մասին չէ։

Անարդար «խաղաղության» նախագիծը, որն հպարտությամբ հրապարակել է ՀՀ ԱԳ նախարարությունը, շատերին կթվա, որ վատ փաստաթուղթ չէ, բայց ի՞նչ է ասում օրինակ 8-րդ հոդվածը, եթե ոչ այն, որ ով համաձայն չէ Փաշինյանի հետ, վաղը հետապնդվելու է որպես անհանդուրժողականություն, ռասայական կամ էթնիկ խտրականություն և ռևանշիզմ քարոզող։

Ես լավ գիտեմ, թե ինչ է նշանակում պատվիրված ձերբակալվելը և սա այն դեպքն է, որ կասկածի նշույլ անգամ չի կարող լինել առ այն, որ Սամվել Կարապետյանը քաղաքական իշխանության պատվերով է ձերբակալվել։

Բայց մի բան հաստատ է` Հայաստանը դիկտատուրայի վերածած Փաշինյանի համար հայկական իշխանության թագը չափազանց մեծ է, ու բացի այն, որ այժմ այդ թագը նրա աչքերն է փակել, այն նաև նրա ականջներն է փակել, իսկ մնացածը ինքը լավ գիտի, թե ինչպես է լինելու...»։