88-ամյա կնոջ տնից գողություն կատարած տղամարդը հայտնաբերվել է

Ոստիկանության օպերատիվ կառավարման կենտրոն օգոստոսի 10-ին ահազանգ էր ստացվել, որ անհայտ անձը ջուր խմելու պատրվակով մտել է մայրաքաղաքի Վաղարշյան փողոցի տներից մեկը և օգտվելով տանտիրոջ անուշադրությունից՝ գողացել նրա պայուսակը, որի մեջ եղել է բջջային հեռախոս ու փող։

Նշված հասցե են մեկնել Քրեական ոստիկանության Երևան քաղաքի վարչության սեփականության դեմ ուղղված հանցագործությունների դեմ պայքարի բաժնի ծառայողները։ 88-ամյա տանտիրուհուց ընդունվել է հաղորդում։ Նախաձեռնվել է քրեական վարույթ։

Ձեռնարկված միջոցառումների արդյունքում պարզվել է, որ գողությունը կատարել է մայրաքաղաքի Շարուրի փողոցի 61-ամյա մի բնակիչ։ Տղամարդը ներկայացվել է Քրեական ոստիկանության Երևան քաղաքի վարչություն, ապա կազմված փաստաթղթերով հանդերձ՝ նախաքննական մարմին։ Ձեռնարկվում են միջոցառումներ գողոնը հայտնաբերելու ուղղությամբ։

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: