Բժիշկը բացատրել է քրոնիկ հոգնածության և սովորական գերհոգնածության նշանների միջև եղած տարբերությունը

Քրոնիկ հոգնածության համախտանիշը (ՔՀՀ) հաճախ շփոթվում է սովորական հյուծվածության կամ գերհոգնածության հետ։ Այնուամենայնիվ, դա բարդ քրոնիկ վիճակ է, որը պահանջում է ախտորոշման և բուժման տարբեր մոտեցում։ Ընտանեկան բժիշկ Դոնալդ Գրանտը բացատրում է վիճակների միջև եղած հիմնական տարբերությունները։

Մասնագետի խոսքով, հիմնական տարբերությունը դրանց բնույթն է և դրանց «բուժման» ձևը: Հոգնածությունը սովորաբար առաջանում է չափազանց սթրեսից, որը հաճախ կապված է աշխատանքի կամ որևէ կոնկրետ իրադարձության հետ: Այն կարելի է հաղթահարել հանգստանալով և սթրես առաջացնող խնդիրները լուծելով:

Քրոնիկ հոգնածության համախտանիշը  քրոնիկ հիվանդություն է, որի դեպքում հանգիստն ու քունը թեթևացում չեն բերում: Մարմինը կարող է լիովին ուժասպառ լինել նույնիսկ աննշան առաջադրանքներից հետո:

Բժիշկը նշել է ՔՀՀ-ի ախտանիշներ՝

• ֆիզիկական ծանրաբեռնվածությունից հետո հոգնածություն՝ պարզ գործողություններ կատարելուց հետո լիակատար ուժասպառության զգացում։

• ճանաչողական խանգարում՝ հիշողության, կենտրոնացման դժվարություն և գիտակցության «մշուշոտություն»։

• ֆիզիկական ախտանիշներ՝ հոդերի և մկանների ցավ՝ առանց որևէ ակնհայտ պատճառի։

• քնի խանգարումներ՝ անքնություն կամ չվերականգնող քուն, նույնիսկ եթե քնի տևողությունը պահպանվում է։

Բժիշկը որպես քրոնիկ հոգնածության համախտանիշի  զարգացման կամ սրացման ռիսկի գործոններ նշել է դաշտանադադարը, հոգեկան առողջության հետ կապված խնդիրները, հետքովիդյան համախտանիշը և այլ վիրուսային վարակները: Քանի որ քրոնիկ հոգնածության համախտանիշի  ախտորոշման համար թեստ չկա, ախտորոշումը հիմնված է ախտանիշների և բժշկական պատմության վերլուծության վրա: Բուժումը նույնպես անհատականացված է և կարող է ներառել կոգնիտիվ վարքային թերապիա, ախտանիշները մեղմելու համար դեղորայք: