«Ժողովուրդ». Սեպտեմբերի 1-ը Ժաննա Անդրեասյանի բացարձակ անպատասխանատվության պայմաններում

«Ժողովուրդ» թերթը գրում է.

«Սեպտեմբերի 1-ը մոտենում է դասագրքերի բացակայության և ՀՀ ԿԳՄՍ նախարար Ժաննա Անդրեասյանի բացարձակ անպատասխանատվության պայմաններում։ Ոչինչ չէր փոխվել ամառային արձակուրդներից հետո. նախարարը նույն ագրեսիան էր ցուցաբերում, միայն թե նոր՝ կտրուկ սանրվածքով:

Տեղեկացնենք, որ Հայաստանի շուրջ 413.112 աշակերտներ սեպտեմբերի 1-ին դպրոց են գնալու առանց անհրաժեշտ դասագրքերի։ Այո՛, ճիշտ կարդացիք՝ դասագրքեր չկան։ Ըստ կրթության փորձագետ Սերոբ Խաչատրյանի՝ ավելի քան տասը դասագիրք, այդ թվում՝ ֆրանսերեն (5-11-րդ դասարան), Հայոց պատմություն, Քիմիա, Կենսաբանություն, Հանրահաշիվ, ինչպես նաև Ռազմագիտություն, պարզապես բացակայում են, որովհետև ԿԳՄՍ նախարարությունն այս տարի ևս «չհասցրեց» տպագրել դրանք:

Սա սովորական վարչարարական ձախողում չէ. սա կրթական համակարգի նկատմամբ բացահայտ անպատասխանատվություն է, որի հետևանքները կրում են աշակերտները, ուսուցիչները և ծնողները։

Այս ֆոնին երեկ ԿԳՄՍ նախարար Ժաննա Անդրեասյանը մամուլի ասուլիս էր հրավիրել՝ փորձելով քողարկել ձախողումների շղթան՝ կոպիտ, ագրեսիվ ու վիրավորական վարքագիծ դրսևորելով։

Լրագրողների պարզաբանում պահանջող հարցերը նախարարը որակեց որպես «իմաստազուրկ», իսկ լրագրողներին՝ իրավական գիտելիքներից զուրկ՝ ուղղակիորեն ասելով.

«Ես չեմ կարող զբաղվել ձեր լրագրողական կրթությամբ….»:

«Ցավում եմ էն կրթական մակարդակի համար, որ տեսնում եմ….»:

«Գնացեք սովորեք՝ օրենքը շրջաբերականից տարբերել….»:

«Հարցերը իմաստազուրկ են, դուք հարց չեք ձևակերպում….»:

Սա չի կարող բնութագրվել այլ կերպ, քան իշխանական ցինիզմ, բարձրաձայն արհամարհանք հանրության հանդեպ ու ճնշում լրագրողական ազատության նկատմամբ։

Նախարարը նույն ասուլիսում մեղադրեց լրագրողներին՝ իբր «մանիպուլացնում» են Ակադեմիական քաղաքի գաղափարը՝ նշելով, թե այն նախատեսված է 44 հազար ուսանողի համար, մինչդեռ կա մոտ 80 հազար ուսանող։

«Ժողովուրդ» օրաթերթը սույնով դիմում է Կոռուպցիայի կանխարգելման հանձնաժողով՝ սկսելու ծառայողական վարույթ ԿԳՄՍ նախարարի վարքագծի վերաբերյալ։ Պետական պաշտոնյան, որը հրաժարվում է պատասխանել հանրային հարցերին ու փոխարենը վիրավորում է լրագրողներին, չի կարող և չպետք է շարունակաբար մնալ առանց վերահսկողության։

Հիշեցնենք, որ նախարարը ձկան նման լռեց այն ժամանակ, երբ իրապես պետք է պատշաճ վարքագիծ դրսևորեր. երբ վարչապետ Նիկոլ Փաշինյանը դպրոցում տեղադրված ցնցուղը պոկեց պատից և նախարարին հրահանգեց ճշտել դրա գինը: Ժաննա Անդրեասյանն այնքան անպատասխանատու է գտնվել, որ ցայսօր չի հայտնում նաև՝ ի վերջո այդ ցնցուղն ի՞նչ արժեր, արդյո՞ք պետական միջոցները արդյունավետ էին ծախսվել»։

Մանրամասները թերթի այսօրվա համարում։